Tedi Blushi prezanton 16 propozimet e Partisë së Lirisë për shëndetësinë

Partia e Lirisë zhvilloi sot një tryezë të posaçme për çështjet e shëndetësisë, me pjesëmarrjen e Sekretarit të Përgjithshëm, Tedi Blushi, si dhe mjekëve dhe ekspertëve të fushës, ku u diskutuan problematikat aktuale të sistemit shëndetësor në vend dhe u prezantuan propozime për përmirësimin e tij.

Në fjalën e tij, Blushi prezantoi një paketë me 16 masa të Partisë së Lirisë, të cilat synojnë, sipas tij, rritjen e financimit në shëndetësi, përmirësimin e shërbimeve dhe forcimin e sistemit publik.

Ai deklaroi se, “shëndetësia në Shqipëri përballet me probleme serioze strukturore”, duke theksuar nevojën për reforma dhe rritje të investimeve publike në këtë sektor.

Blushi propozoi dyfishimin e pagave për mjekët dhe infermierët, rritjen e buxhetit për shëndetësinë në 6% të PBB-së, si dhe zgjerimin e listës së barnave të rimbursueshme.

“Është e domosdoshme të ndalet largimi i mjekëve dhe infermierëve dhe të krijohen kushte më të mira pune dhe financimi në sistemin shëndetësor publik”, u shpreh Blushi.

Ai propozoi gjithashtu masa për përmirësimin e furnizimit me barna, forcimin e sistemit të referimit, si dhe rritjen e transparencës në menaxhimin e fondeve publike në shëndetësi.

Ndër prioritetet e përmendura ishin edhe forcimi i shërbimit parësor, decentralizimi i sistemit shëndetësor dhe hartimi i planeve kombëtare për sëmundjet me vdekshmëri të lartë.

Në fokus të diskutimeve u vendos edhe përmirësimi i trajtimit të pensionistëve, përmes mbulimit më të gjerë të barnave dhe shërbimeve mjekësore në banesë, si dhe reduktimi i kostove të drejtpërdrejta për qytetarët. ATSH