Tërhiqet nga gara për kreun e PD-së në Kukës, Elezi: Po përdorin listat e Bashës

Pak orë pasi nisën dhe votimet, kandidati për kreun e PD-së në Kukës, Irel Elezi është tërhequr nga gara. Për të listat e votimit të anëtarësisë, nuk përputhen me ato të qershorit dhe se Komisionit i Rithemelimit po operon me listat e Bashës. Manipulimin e garës dhe të listave, ai i rendit si arsyet përse ka dhënë dorëheqjen si kandidat për marrjen e PD-së në Kukës.

Postimi i plotë

Meqënëse ditën e djeshme pas marrjes së listave të votimit të anëtarësisë, kam verifikuar se ato nuk përputhen me listat e qershorit 2021, mbi 200 emra.

Për rrjedhoje i kërkova grupit të Rithemelimit listat e hartuara nga grupi gjatë procesit riorganizimit pas Kuvendit të datës 11 dhjetor.

Ata pohojnë se nuk kanë hartuar lista gjatë këtij procesi. Për rrjedhojë këto janë duke operuar me listat e Lulzim Bashës dhe nuk deklarojnë origjinën e tyre.

I kërkova komisionit të ndërpresë procesin që para fillimit dhe të verifikojmë origjinën e këtyre listave. Dorëzova ankimimin pranë komisionit, në rast të vazhdimit te njëanshëm deklaroj: Tërheqjen nga gara për arsye të manipulimit të listave dhe të garës.