Tirana ndryshon mendje, i kërkon Serbisë lirimin e 3 policëve

Pak orë pasi kryeministri Rama i quajti nxitje të konfliktit thirrjet që i vinin për të reaguar, qeveria ndryshoi qëndrim në lidhje me arrestimin e tre policëve të Kosovës nga forcat serbe.

Ministrja e Europës dhe e Punëve të Jashtme, Olta Xhaçka nuk priti hetimin e KFOR-it për të cilin fliste pak më herët Rama. “Është po ashtu e domosdoshme që Qeveria e Serbisë të lirojë pa humbur kohë të tre policët. Në të tilla raste, edhe të kalimit të kufirit dhe të hyrjes në një zonë e cila do të konsiderohej e Serbisë, nëse e tillë ka qenë ngjarja, sigurisht që nuk parashikon arrest por do të parashikonte një kthim pas”,-tha Xhaçka.

Kosova u imponua si temë debati nga opozita, me Sali Berishën që akuzoi Serbinë për sulm terrorist ndaj fqinjit jugor. “Rrëmbimi i ushtarëve të policëve të Kosovës përbën një akt terrorist, banditesk, një shkelje flagrante të rezolutës së OKB të pavarësisë së Kosovës”, deklaroi Berisha.

Kundërpërgjigjen për këto akuza ai e mori më vonë nga Xhaçka. “Ata që bërtasin më shumë se ju digjet barku për Kosovën janë ata që kanë bërë më pak, ose i kanë bërë më shumë dëm Kosovës”, u shpreh ministrja.