Topalli: Për diasporën PD është vonë! Duhet të jesh SpaceX i Elon Musk që ta bësh vetëm

Drejtuesja e PD për diasporën, Jozefina Topalli thotë se vota e emigrantëve do të jetë faktor kyç në zgjedhjet e pranverës. ”Unë e konsideroj një sfidë planetare, një shteg që nuk është shkelur më parë. Diaspora do të jetë faktor për disa arsye, vetë procesi politik i bën faktor, për të bërë rotacionin, ata nuk kanë ikur nga qejfi, por mos-mundësia për të ndërtuar jetën në Shqipëri”,-tha Topalli.

Me shqetësim, Topalli po sheh aktivitetin e PS për të thithur votën e emigrantëve. Ajo akuzon se socialistët po përdorin ambasadat, presionin ndaj administratës dhe takimet e luksit.

”Është fakt që PD ka nisur më vonë sesa PS përgatitjet, sepse ne para 1 muaji kemi qenë parti e arrestuar. Në këto kushte po bëhet maksimumi, por ndihem mirë që kryetari ka mbledhur deputetët, grupin parlamentar, kryesinë për t’i angazhuar sepse duhet të jesh SpaceX i Elon Musk që ta bësh vetëm, por takime shpejt do të ketë edhe nga deputetët, po përpiqemi të rikuperojmë, jemi në garë me kohën, e vetmja gjë që ata na mundin është paraja e luksi, këtu nuk i kapim dot”, tha për ”Report Tv”.