”Turi i Mirënjohjes” për rezultatin e thellë që mori PS-ja në zgjedhjet lokale, kryeministri dhe kryesocialisti Edi Rama ndaloi këtë të premte në Durrës. Rama tha se rezultati i 14 majit ishte historik për Partinë Socialiste. Nga ana tjetër, kreu i qeverisë tha se kjo është një barrë shumë e madhe që qytetarët iu kanë dhënë për të çuar përpara zhvillimin e vendit.
“Për herë të parë pas 20 vjetesh, PS është forcë e parë në Këshillin bashkiak të Durrësit dhe në shumë vende të tjera, jemi bërë forcë e parë në Këshillin bashkiak edhe në Shkodër dhe Tropojë. Kjo është një barrë shumë e madhe.
Fakti që ne marrim rezultatin më të mirë historik në zgjedhjet vendore, është shprehje e një pritshmëri shumë të madhe, por jo e një kënaqësie të madhe të njerëzve me punën tonë, njerëzit na mbështesin, por presin akoma më shumë. Do ishte gabim që ta merrnim këtë votë si kënaqësi. Jemi zgjedhja e tyre më e mirë.
Nuk do të thotë që janë të kënaqur me ne, se ka shumë gjëra që ne mund t’i bëjmë më mirë. Siç e patë, kjo fushatë ishte sa lokale edhe kombëtare. Është e rëndësishme që të kuptojmë që njerëzve i kemi hyrë në borxh të madh, duke i kërkuar të na votojnë ne sepse vetëm me ne shkohet përpara dhe kemi marrë një sfidë shumë të madhe”, tha Rama.