Ulsi Manja: Në 2027, mikpresim Kongresin Botëror të Drejtësisë

Ministri i Drejtësisë Ulsi Manja, foli në Konferencën e Kryetarëve të Gjyqtarëve që po mbahet në Vlorë, ku përmendi reformën në drejtësi, teksa tha se që nga nisja e saj, qëllimi ka qenë të rikthehet besimi te publiku për sistemin e drejtësisë.

Manja tha se kjo konferencë zhvillohet në një moment të veçantë pasi në vitin 2027, Shqipëria do të mikpresë Kongresin Botëror të Drejtësisë. Ministri përmendi gjithashtu se Shqipëria ka ndërmarrë një investim të madh në dixhitalizimin e sistemit gjyqësor përmes ngritjes së Sistemit të Integruar të Menaxhimit të Çështjeve Gjyqësore (ICMIS).

“Qeveria shqiptare nëpërmjet Ministrisë së Drejtësisë ka siguruar planifikimin e duhur buxhetor afatmesëm (për shumën totale 1,059,950 mijë lekë (10,75 milion Euro) dhe janë siguruar fondet e duhura në Buxhetin e vitit 2025 për të siguruar implementimin dhe financimin e plotë të këtij sistemi për gjyqësorin shqiptar. Ky investim, së bashku me mbështetjen mbi 7.5 milionë euro nga Bashkimi Evropian dhe mbi 1.8 milionë euro nga Suedia, sigurojnë që brenda pak vitesh i tërë sistemi i drejtësisë të shërbehet nga sisteme moderne dhe të jetësojë e-Drejtësinë (Drejtësinë Digjitale), me impakt të drejtpërdrejtë për publikun shqiptar“, tha ministri.