Nënkryetari i LSI-së, Petrit Vasili vijon që të hedh akuza për aferën e incerenatorëve. Këtë herë ai thotë se ka nxjerrë në dritë fakte të reja, ku akuzon Bashkinë e Tiranës dhe ka abuzuar me fondet. Vasili i bën thirrje SPAK-ut që të veprojë. ”Bashkia e Tiranës merr 12 automjete për përdorim nga kompania e inceneratorëve të Tiranës me sebepin e pandemisë, kur kjo kompani nuk ka asnjë lidhje me shitjen apo dhënien me qira të automjeteve. Kompania e inceneratorëve duke mos pasur asnjë lidhje me dhënien me qira të automjeteve, shkon dhe i merr hua për llogari të Bashkisë në kompanitë që lëshojnë automjete me qira”.
Postimi i plotë
Toka shtetërore u lejua të lihej peng në bankë që Kompania e inceneratorëve të merrte 8 milion euro kredi. Kredia u miratua nga Bashkia e Tiranës dhe Ministria e Industrisë dhe Energjisë pikërisht në nëntor të vitit 2021, kur ishin bërë prej një viti kallëzimet në SPAK dhe kur kishte filluar hetimi dhe sekuestrimi i dokumentave nga SPAK-u.
Banka pasi i dha 6.9 milion euro kredi kompanisë së inceneratorëve ndaloi dhenien e 1.1 milion sepse kishte filluar hetimi. Banka për interesat e saj tregohet shumë e përgjegjshme ndërsa Bashkia e Tiranës dhe Qeveria, të cilat në shpërdorim flagrant të detyrës dhe të interesit publik, lënë peng pronat në dorë të mafiozeve të inceneratorëve qe ishin nen hetim.
Bashkia e Tiranës merr 12 automjete për përdorim nga kompania e inceneratorëve të Tiranës me sebepin e pandemisë, kur kjo kompani ska asnjë lidhje me shitjen apo dhënien me qira të automjeteve. Kompania e inceneratorëve duke mos pasur asnjë lidhje me dhënien me qira të automjeteve, shkon dhe i merr hua për llogari të Bashkisë në kompanitë që lëshojnë automjete me qira.
Katër automjete merren me qira nga kompania e inceneratorëve tek kompania Albarent ku adminstratore është gruaja e Drejtorit të përgjithshëm të Shërbimeve të Trasportit Rrugor, Blendi Gonxhe. Vetëm për qiranë e katër automjeteve janë paguar 38400 euro në vit.
Marrëveshja është 2-vjeçare dhe në tërësi 12 automjetet shpenzohen rreth 200 mijë euro që kompania e inceneratorëve i paguan për Bashkinë e Tiranës për një shërbim që nuk ka asnjë lidhje me incenerimin apo trajtimin e mbeturinave. Faktet flasin vetë! SPAK ka detyrimin të hetojë sesi po shkatërrohet interesi publik dhe të çojë përgjegjësit përpara drejtësisë.