Nënkryetari i LSI-së, Petrit Vasili, ka dhënë detaje nga marrëveshja e firmosur sot mes PD-LSI për zgjedhjet e 25 prillit. Duke pranuar faktin që LSI është një parti e majtë, ai tha se kanë pasur të njëjtën filozofi me PD-në, sa i takon taksës së sheshtë. Ndërsa koalicioni i madh opozitar, sipas tij, ishte i nevojshëm pasi njerëzit presin zgjidhje të mëdha. “Përtej ironisë tuaj patjetër që jemi të tillë (të majtë). Në rastin konkret kur ka nevojë të madhe që njerëzit të presin zgjidhje të mëdha duhen zgjidhje gjithëpërfshirëse. Një aleancë historike se nuk është verifikuar përgjatë viteve të tranzicionit. Ne kemi pasur një eksperiencë të mëparshme 2009-2013 që ishte liberalizmi i vizave, arritje madhore, bume të mëdha në infrastrukturë dhe kemi kaluar gripin e derrit për shkak të menaxhimit racional. Kur ka përgjegjshmërinë e duhur është në të mirë të qytetarëve të cilët mbështesin aleancën”.
Taksa e sheshtë thekson Vasili, është filozofi dhe kredo politike e LSI-së, por dhe qasje e PD-së. “Kur flitet për LSI duhen parë programet e LSI-së në vite. Taksa e sheshtë ka qenë filozofi dhe kredo e panegociuar. Është qasje që kemi pasur të dyja partitë. Koherencë absolute e LSI-së. Kemi pasur këtë filozofi, jemi gjetur njëlloj me këtë filozofi”. I pyetur nëse LSI-ja do të respektojë proporcionalitetin pas zgjedhjeve të 25 prillit, Vasili u shpreh se do të mbajnë në qeveri peshën elektorale që do kenë. “Po ta analizonit edhe në 2009, LSI-ja edhe në atë kohë ishte proporcionalisht me votat që mori. Siç është e shkruar e zezë në të bardhë, ashtu do të zbatohet. Atë peshë elektorale që ke, atë do të mbash në qeveri”. Sa i takon qëndrimit për reformën në drejtësi, Vasili theksoi se PD dhe LSI kanë të njëjtin qëndrim për ta zbatuar, sipas asaj, që u votua në korrik.
“Nuk kemi pasur asnjë ndarje me PD-në në asnjë pikë parimore. PD e LSI kanë vetëm një bindje, zbatim të reformës në drejtësi sipas asaj që u votua në korrik. I qëndrojmë besnik asaj reforme në drejtësi që kemi votuar me vullnet të plotë”. Ai mohoi të kenë diskutuar për zgjedhjen e presidentit, por tha se qëllimi kryesor i PD e LSI është të nxjerrë vendin nga humnera. “Çështjet themelore të opozitës së bashkuar nuk presin më asnjë sekondë, kemi borxhin publik të rritur, jemi në prag të kolapsit ekonomik, jemi kthyer në lavatriçe të parave të pista dhe Bashkia e Tiranës është kthyer në lavatriçe të parave të pista. Këto janë objektivat themelore të opozitës së bashkuar dhe presin përgjigje në muajt e parë. Asnjë diskutim për presidentin përveçse të nxjerrim vendin nga humnera”.
I pyetur për pritshmëritë pas 25 prillit, Vasili deklaroi se garancia qëndron në koalicionin e madh opozitar për ekuilibër dhe pastrimin nga e keqja, duke shtuar se 100 mandatet janë të mundura. “Për shkak të ndryshimeve të njëanshme, s’ka ndodhur kurrë në 30 vjet të bëjnë këtë akt kaq të dhunshëm të zgjedhjeve që njëra palë të përcaktojë rregullat. Kemi pasur marrëveshje politike. Po zbatohet në marrëveshje të reja dhe kemi zgjedhur një taktikë për të prodhuar rezultatin opozitar. 300 kandidatë opozitarë. Koalicioni opozitar është një garanci që të kemi qeverisje të ekuilibruar, koalicioni jep garanci për ekuilibër dhe pastrimin nga e keqja. Kini durim se 25 prilli është afër”.
Të larguarit nga LSI-ja e kanë pastruar partinë thonë Vasili, i cili shton se lëndë të parë për inceneratorët do të ketë gjithmonë, por plehra janë ato që digjen gjithmonë. “Të larguarit e kanë shëndoshur, jo dobësuar LSI-në, ka pasur transformim se vullnete të kalbura dhe të shitura vetëm pastrojnë. Lëndë të parë për inceneratorët do të ketë gjithmonë, por plehra janë ato që digjen gjithmonë”.
Sa i takon integrimit, Vasili shprehet se hapja drejt Evropës është jetike edhe për zhvillimin ekonomik të vendit. Sipas tij, vetëm fronti opozitar mund t’i japë zgjidhje situatës. “Varhelyi ka folur për kushtet, për konferencën e parë. Pandëshkueshmëria e krimit elektoral, zgjedhjet, goditja e krimit e korrupsionit janë të paplotësuara. Oliver Varhelyi ishte kritik për shkeljen e marrëveshjes së 5 qershorit. Mbajtja e zgjedhjeve me standarde minimale bazike. Ne kemi një fenomen që po shkatërron ekonominë. Hapja drejt Europës është jetike për ne, se nuk zgjidhet as kriza ekonomike. Kur liberalizuam vizat, Shqipëria u konsiderua histori suksesi. U pa që Shqipëria nuk e pati këtë fluks. Këto duan përgjigje të drejtpërdrejtë. Vetëm ky front mund t’i japë një përgjigje, në themelet kryesore ku është tundur”. /A2cnn/