Vasili: Vetëkënaqësia mund ta dëmtojë mazhorancën

Nënkryetari i Lëvizjes Socialiste për Integrim Petrit Vasili ka komentuar dorëheqjen e një dite më parë të Edmond Haxhinastos nga posti i ministrit të Transporteve. Në një intervistë dhënë pak më parë për Report TV, Vasili mohon që të ketë ndonjë mosmarrëveshje mes kreut të LSI-së Ilir Meta dhe Haxhinastos. “ Nuk ka asnjë mosmarrëveshje mes Metës dhe Haxhinastos .Shkak i dorëheqjes, angazhimi i tij në konventën e LSI dhe zgjedhjet brenda LSI-së, pasi në fund të nëntorit, do të mbahen zgjedhjet në LSI për kryetarin e partisë”- tha Vasili.

Ndërkohë, kreu i grupit parlamentar bëri me dije gjithashtu, se disa deputetë kanë kritikuar ministrat e LSI-së, pasi kritikat e LSI ndaj ministrave, kanë qenë për të mos kaluar në vetëkënaqësi, pasi nga kjo, tha ai, mund të dëmtohet një mazhorancë. “Ndryshime të reja në qeveri? Këtë e vendos kryeministri Edi Rama. Jam i vetëdijshëm se, disa deputetë kanë kritikuar ministrat e LSI-së, s’ka asgjë. Kritikat e LSI-së ndaj disa ministrave janë për të mos kaluar në vetëkënaqësi, pasi vetëkënaqësia është sëmundja më e keqe nga e cila dëmtohet mazhoranca. Sugjerimet tona janë jo për të lëkundur ndonjë karrige ministri” ka thënë ai.