Zjarret nuk po ndalen, Shqipëria në rrezik të katastrofës natyrore

Rajoni është në luftë të egër me flakët që po djegin me mijëra hektarë pemë, por më e rëndësishmja që po rrezikohet rëndë edhe jeta e banorëve, aty ku zjarret janë aktive.

Zjarret në Karaburun fatkeqësisht po vijojnë, pasi flakët po përparojnë me shpejtësi drejt Llogorasë dhe zonave të banuara në Dukat. Banorët e kanë të pamundur të mbrohen të vetëm nga flakët. Ata kanë qëndruar gjitha natën në roje. Ndërkohë që era e fortë po e shtyn zjarrin më në jug drejt pyjeve me pisha në Llogora.

Nëse zjarri mbërrin atje, dëmi do të jetë i jashtëzakonshëm por edhe rruga nacionale bëhet e pakalueshme. Në ditën e tetë të katastrofës natyrore në Karaburun, ushtria ka ndihmuar me 500 forca emergjencat. Ushtarët janë të pajisur vetëm me nga një lopatë, por ndërhyrja e tyre është e rrezikshme sepse flakët ecin më shpejt se njerëzit.

Një vatër e madhe zjarri është krijuar në fshatin Arshilengo në Lunxhëri. Tymi ka mbërritur deri në qytetin e Gjirokastrës. Vatrat e zjarrit kanë dalë jashtë kontrollit edhe në Shllak, ku rrezikohen banesat. Banorët e Arshilengos gjithashtu kanë nisur të braktisin banesat, për t’i shpëtuar përparimit të flakëve, me ndihmën e Policisë.

Përveç zonës së Dukatit në Vlorë, një vatër zjarri është riaktivizuar edhe në Lunxhëri. Në vendngjarje kanë shkuar efektivët e repartit zjarrfikës, për të shuar flakët që janë përhapur në zonat e larta kodrinore. Në Gjirokastër, janë djegur deri më tani 40 hektarë kullota dhe 500 rrënjë arre.

Për momentin nuk pritet ndonjë ndihmë konkrete nga vendet fqinje, pasi situata e zjarreve është problematike thuajse në të gjithë rajonin e Ballkanit. Nëse flakët nuk shuhen, Shqipëria me të vërtetë rrezikon që të jetë drejt një katastrofe natyrore