Fati i Vuçiç varet në referendum, serbët në votime

Fati i Aleksandër Vuçiç si president i Serbisë do të varet në një referendum. Kryetarja e Kuvendit, Ana Brnabiç, gjatë të mërkurës do të dorëzojë 100 nënshkrime të deputetëve të shumicës qeverisëse për mbajtjen e një votimi popullor lidhur me besimin ndaj presidentit.

E në fakt, referendumin duket se e ka kërkuar vetë Vuçiç. Përmes një videoje të publikuar në rrjetet e tij sociale, presidenti serb thotë se Qendra Joqeveritare për Hulumtim, Transparencë dhe Përgjegjësi në Beograd, Crta, kohët e fundit publikoi rezultatet e një sondazhi, sipas të cilit, shumica e serbëve janë pro largimit nga posti.

Për opozitën kjo është një tjetër përpjekje e regjimit për të organizuar një referendum pa përmbushur kushtet zgjedhore, duke sjellë sërish votues të rremë duke tjetërsuar rezultatin.