Greqi, policia shpëton shqiptarin që e pickoi gjarpri

Një shtetas shqiptar në Greqi është ndodhur në një situatë të rrezikshme për jetën, mesditën e të shtunës.

Në rrethana ende të panjohura, ai është pickuar nga një gjarpër në kodrat rreth fshatit Protopapas, midis Kallpakit dhe Janinës.

Edhe pse i shokuar nga sulmi i gjarprit, shqiptari e ka ruajtur gjakftohtësinë dhe i ka telefonuar numrit të emergjencës së policisë.

Policëve u është dashur pak kohë, që të përcaktonin vendndodhjen e saktë dhe menjëherë më pas i lënduari është marrë me një autombulancë të ndihmës së shpejtë dhe është dërguar në spitalin Haxhikosta të qytetit.

Aty po mbahet nën kujdesin e mjekëve dhe gjendja e tij shëndetësore raportohet jashtë rrezikut për jetën.

Megjithatë, policia po heton nëse shtetasi shqiptar ndodhej me dokumente të ligjshme në shtetin grek, pasi dyshohet se mos ai po mblidhte bimë medicinale në momentin e pickimit nga gjarpri.