Pimen është prift i Dioqezës Evropiane tanimë tetë vjet, ndërsa në publik është i njohur me deklaratat e tij racionale dhe kritikuese ndaj problemeve në Maqedoni. Për këtë shpesh ka qenë në qendër të kritikave të ashpra nga pjesëtarë të kishës maqedonase, si dhe të pushtetit “konservativ” maqedonas.
Peshkopit Pimen, nuk i ka ikur edhe paraqitja e prokurores speciale të Maqedonisë Fatime Fetait, e cila para disa ditëve gjatë shpalosjes së rastit “Tortura”, në fillim iu drejtua gazetarëve dhe publikut në gjuhën shqipe.
Pimen në profilin e tij zyrtar në Facebook, për rastin në fjalë ka shkruar në gjuhën shqipe, duke porositur se përdorimi i gjuhës shqipe nuk është mëkat. Madje, përkujton ata që u “tmerruan” nga shqipja e Fatime Fetait, se disa nga kryeministrat e Maqedonisë gjatë fushatave zgjedhore kanë “llafosur” shqip.
“Përkthejeni. Bëni përpjekje. E vetmja që do të kuptoni është se gjuha nuk është herezi, e as tradhti kombëtare”, ka shkruar Pimen në maqedonishte në vazhdim të mesazhit.
Një postim për paqe dhe kundër vendosjes së kryqeve dhe simboleve të tjera, i ka kushtuar me fyerje dhe akuza peshkopit maqedonas Pimen, në fillim të muajit mars.
Siç kemi informuar më parë, ai tha se “në Maqedoni shqiponjat dhe kryqet vendosen për të filluar marrëzitë”.
Ja se çfarë ishte porosia e tij në rrjetin social Facebook:
“Derisa në botë, monumentet përkujtimore vendosen si simbole për t’i dhënë fund gjakderdhjeve, tek ne shqiponjat dhe kryqet vendosen për të filluar marrëzitë”, ka shkruar peshkopi Pimen, duke dënuar tentimet për të acaruar ndjenjat fetare dhe për të nxitur urrejtje midis qytetarëve.