Vendimi i Gjykatës së Hagës për ta liruar kreun e radikalëve serb, Vojsllav Sheshel, nga të gjitha akuzat për krim gjatë luftërave në ish-Jugosllavi, vazhdon ta shqetësoj Zagrebin zyrtar.
Përfaqësues të Kroacisë, kanë kërcënuar tashmë disa herë se do të jenë më të vëmendshëm gjatë negociatave të Serbisë për anëtarësim në BE.
I fundit që është deklaruar lidhur me këtë çështje, ka qenë zëvendëskryeministri kroat, Tomislav Karamarko, i cili ka thënë se Kroacia nuk do ta pengojë Serbinë drejtë anëtarësimit, por ka shtuar se ky shtet fqinjë duhet t’i plotësojë të gjitha kushtet, para se të jetë pjesë e familjes evropiane.
Mirëpo, serbët këto deklarata po i përkthejnë si një kërcënim të Kroacisë për pengim të anëtarësimit.
Është ministri i Jashtëm i Serbisë, Ivica Daçiç, i cili deklaratat e ardhura nga Zagrebi po i quan si kërcënim dhe tendencë për ta nënvlerësuar Serbinë.
“Serbia nuk do të lejojë që t’i përulët askujt apo edhe ta poshtërojë, duke i vendosur kushte të ndryshme të marrëdhënieve dypalëshe nga shtetet e rajonit, e aq më shumë kur bëhet fjalë për Kroacinë”, ka thënë Daçiç.
Lirimi i Sheshelit ka ngritur shqetësim edhe të vendeve të ndryshme, në rajon dhe më gjerë. Më shqetësuesja ka qenë deklarata e tij pas lirimit, ku kishte thënë se ideja për “Serbinë e Madhe”, ende nuk është shuar./lajmi.net