Universiteti i Tetovës nderon presidentin Thaçi me titullin “Doctor Honoris Cuasa”

Presidenti Thaçi tha se qytetet e Kosovës me qendrat urbane të Maqedonisë ku jetojnë shqiptarë kanë një lidhje historike, kulturore, familjare, kombëtare dhe mbi të gjitha vëllazërore

Presidentit të Republikës së Kosovës, Hashim Thaçi, në një ceremoni solemne të mbajtur në Universitetin e Tetovës iu nda titulli “Doctor Honoris Causa” nga ky universitet për angazhimin e dhënë ushtarak dhe politik në çlirimin dhe pavarësimin e Kosovës, për pasionin dhe dashurinë për ndërtimin e paqes së përhershme në Ballkan, për krijimin e kushteve më të mira për jetë dhe për avancimin e të drejtave njerëzore për të gjitha komunitetet e Kosovës.

Rektori i Universitetetit të Tetovës, Vullnet Ameti, i cili i ndau titullin presidentit Thaçi, në fjalën e tij përshëndetëse theksoi se presidenti Thaçi ka kontribuar në arsimin dhe shkencën shqiptare, si dhe në vazhdimësi jep mbështetje të fuqishme ndaj universitetit që drejton ai.

“Për kombin shqiptar dhe kombet tjera që jetojnë në rajon, figura e presidentit Thaçi është e lidhur ngushtë me zhvillimet politike dhe gjeo-strategjike në Ballkanin Perëndimor, zhvillime këto që, sipas tij, i paraprijnë zgjidhjes së çështjes së Kosovës, avancimin e të drejtave dhe lirive të kombit shqiptar në trojet e Maqedonisë, Luginës së Preshevës dhe më gjerë”, u shpreh Ameti.

Ameti shtoi se presidenti Thaçi me veprimtarinë e tij të bujshme në shërbim të kauzës kombëtare shqiptare, si dhe me angazhimin intensiv shoqëror e politik, ka dhënë prova të pakontestueshme se është lider i denjë për tërë popullin shqiptar.

Presidenti Hashim Thaçi në fjalën e tij theksoi se shqiptarët e rajonit bashkarisht kanë kaluar një histori dhe rrugëtim të përbashkët e të suksesshëm deri më sot. Ai shtoi se para disa dekadave vet ishin aktor dhe dëshmitar të një procesi të madh zhvillimesh historike.

“Rruga për të ardhur këtu ku jemi sot është produkt i sakrificës së madhe të gjeneratës sonë, si vazhdimësi e pandërprerë e përpjekjeve të shumë gjeneratave para nesh. Andaj sot me krenari këtu mund të them dhe që universiteti juaj i Tetovës përmend njërën nga pikat e patejkalueshme në trekëndëshin akademik, albanofon, Prishtinë, Tiranë dhe Tetovë”, u shpreh presidenti Thaçi.

Presidenti Thaçi tha se qytetet e Kosovës me qendrat urbane të Maqedonisë ku jetojnë shqiptarë kanë një lidhje historike, kulturore, familjare, kombëtare dhe mbi të gjitha vëllazërore. Synimet e përbashkëta të popullit të Kosovës dhe Maqedonisë, siç tha ai, janë në një vijë të përputhshme dhe ajo është integrimi në familjen evropiane, ku gjithmonë do të jetojnë së bashku dhe pa i ndarë kufiri.

“Ndërtimi i autostradës ‘Arbën Xhaferi’ është një infrastrukturë e afrimit të qendrave tona. Prishtina, Shkupi dhe Tetova janë gjithnjë e më afër njëra tjetrës, pasi që i lidh historia, e sotmja dhe e ardhmja. Liria e njërit është produkt i tjetrit dhe e kundërta. Liria jonë është produkt i përbashkët dhe këtë e themi shumë hapur”, u shpreh Thaçi, sipas të cilit eliminimi i pengesave dhe bashkëpunimi mes këtyre qendrave e forcon paqen dhe stabilitetin në rajon.

Para të pranishmëve u drejtua edhe zv/kryeministri i Qeverisë së Maqedonisë për zbatimin e Marrëveshjes së Ohrit, Festim Halili, i cili u shpreh se “këtë çmim sot nuk u ndajmë ne, por ky popull që 15 vite më parë u çlirua nga zinxhirët e robërisë, fal ndihmës së madhe dhe angazhimit tuaj, ushtrisë tuaj dhe shtetit që ju drejtoni”.

Të pranishëm në këtë manifestim ishin përfaqësues të partive politike dhe komunave shqiptare në Maqedoni, ministra, rektorë, dekanë dhe profesorë të universiteteve shqiptare në rajon, studentë, si dhe mysafirë të tjerë.

Universiteti i Tetovës deri më tani këtë titull ia ka ndarë edhe nobelistit Ferid Murat, rektorit të parë të Universitetit të Tetovës, Fadil Sulejmani, ish-kryeministrit të Turqisë, Ahmet Davutoğlu, ish-presidentit të Shqipërisë, Bamir Topi, rektorit të Universitetit të Tiranës, Mynyr Koni, si dhe personaliteteve të tjera të shquara publike.-AA