Kujdes! Akulli në lokalet e Tiranës, me shenja të ujërave të zeza

Një vëzhgim për cilësinë e akullit në kryeqytet tregoi se uji që përdoret për të krijuar atë dhe që u shërbehet klientëve gjatë pirjes së kafesë ka shenja të ujërave të zeza. Emisioni investigativ “Fiks Fare” i Top Channel, në bashkëpunim me Institutin e Shëndetit Publik dhe Inspektoriatin Shëndetësor Shtetëror morën mostrat e akullit në disa subjekte private “bar­kafe”, të përzgjedhura rastësisht.

“Këto të fundit u dërguan më pas për analiza, e pas marrjes së përgjigjeve u konstatua se, në disa subjekte, akulli i marrë ishte i ndotur mikrobiologjikisht.

Konkretisht, akulli shfaqte shenja të “Steptokokut fekal”, gjë që tregon se, uji që është shndërruar në akull ka shenja të ujërave të zeza. Tre nga 7 subjektet, ku u morën mostrat e akullit, shfaqnin këtë problematikë.

Dy institucionet kompetente, në ditët në vijim do të marrin masa ndaj subjekteve të gjetura në shkelje, por gjithashtu do të bëhen vëzhgime edhe në subjekte të tjera, për të parë sesi rezultojnë ato.