Virusi Zika transmetohet edhe në rrugë seksuale

Transmetimi në rrugë seksuale i virusit Zika është më i përhapur nga sa mendohej më parë, ka bërë të ditur Organizata Botërore e Shëndetësisë.

Pas një mbledhjeje të komitetit të emergjencave, agjencia e OKB-së për shëndetin deklaroi gjithashtu se, provat për lidhjen mes Zikës dhe defektet tek fëmijët e lindur sa vijnë e shtohen.

Zika përhapet kryesisht nga mushkonjat, por vende të tjera, jo të pakta në numër, kanë raportuar për transmetim seksual të tij. OBSH njoftoi muajin e kaluar se rënia dhe përhapja e virusit përbën një emergjencë globale.

Drejtoresha e përgjithshme Margaret Chan tha se, “raportimet dhe hetimet e kryera në vende të ndryshme sugjerojnë se, transmetimi seksual i virusit është më i shpeshtë nga sa mendohej më parë”.

Duke e cilësuar këtë zhvillim si “alarmant”, doktoresha Chan tha gjithashtu se, mikrocefalia – defekti tek fëmijët e sapolindur që lidhet fuqishëm me rënien e virusit në Brazil – është vetëm një nga anomalitë e konstatuara nga OBSH tek Virusi.

Chan shtoi se, problemet e lidhura me Zikën tashmë po shihen jo vetëm tek gratë në fazë shtatëzënie, por edhe tek fëmijët, adoleshentët e madje edhe të rriturit.