Zbulohet se si të ngadalësojnë plakjen biologjike

Ndërsa u përpoqën të rigjeneronin gjëndrën timus, studiuesit e Universitetit të Kalifornisë Los Anxhelos mund të kenë gjetur një zgjidhje që mund të ngadalësojë procesin e plakjes dhe madje ta kthejë atë, konfirmon një studim i ri. Si pjesë e një studimi në Kaliforni, shkencëtarët testuan një koktej prej tre ilaçesh të zakonshme hormonet e rritjes dhe dy ilaçe të diabetit për të stimuluar rigjenerimin e gjëndrës timus gjatë një viti. Sipas një studimi të botuar në revistën Nature, studiuesit zbuluan se pjesëmarrësit humbën mesatarisht 2.5 vjet në “orën epigjenetike” të tyre, siç matet nga analiza gjurmë e gjeneve të një personi. “Ne prisnim të ngadalësonim orën biologjike, por jo ta kthejmë atë”, tha studiuesi i UCLA Steve Horvath për revistën Nature.

“E gjitha duket një lloj futuriste,” thotë Horvath. Studiuesit paralajmërojnë se gjetjet janë paraprake, pasi vetëm nëntë pjesëmarrës u përfshinë në studim dhe se studimi nuk përfshin një grup kontrolli, por nëse konfirmohet – ndikimi në kujdesin shëndetësor dhe potenciali për të ndikuar në procesin e plakjes mund të jenë të mëdha, transmeton KosovaPress. Ora epigjenetike matet me rekordin e ndryshimeve kimike në strukturën e ADN-së së trupit. Qëllimi kryesor i studimit ishte të testonte nëse hormoni i rritjes mund të përdoret për të rikthyer indet në gjëndrën e timusit, gjë që është thelbësore për funksionimin imunitar. Gjëndra pas pubertetit fillon të zvogëlohet.

Studimet e mëparshme kanë treguar se hormoni i rritjes promovon rigjenerimin e timusit, por gjithashtu mund të shkaktojë diabet, kjo është arsyeja pse ilaçet për diabet përfshihen në studimin e fundit. Shkencëtarët ekzaminuan orët epigjenetike në vullnetarë, duke konkluduar se katër masa të ndryshme të orës epigjenetike të secilit pjesëmarrës ndryshuan ndjeshëm gjatë procesit. “Kjo tregon se efekti biologjik i trajtimit është i fortë,” tha Horvath. Gjashtë pjesëmarrës dhanë kampione gjaku gjashtë muaj pas testimit, dhe efekti mbeti i njëjtë, duke e bërë Horvath shumë optimist për studimet e ardhshme. Testet do të përfshijnë pjesëmarrës të ndryshëm sipas moshës, gjinisë dhe kombësisë, dhe tre ilaçet do të testohen në mënyrë të pavarur për të përcaktuar efektet specifike. /TCH/