Aurela Gaçe ka dëshmuar sërish se skena është habitati i saj natyral, ku ajo jo vetëm dhuron muzikë, por dhe ndez emocione të fuqishme. Së fundmi, diva e skenës shqiptare ka ndarë me ndjekësit e saj në Facebook një set fotografik që ka tërhequr menjëherë vëmendjen e të gjithëve. E veshur me një fustan të kuq flakë, një përzgjedhje që harmonizonte në mënyrë perfekte elegancën dhe finesën me temperamentin e saj pasionant, Aurela dukej absolutisht rrezatuese, duke mishëruar një stil magjepsës që shpërthente në skenë.
Këto imazhe ishin kartolina e saj e mirënjohjes pas një nate të paharrueshme të kaluar me komunitetin shqiptar në Amerikë. Përmes një mesazhi të ndier dhe plot ngrohtësi, ajo ka falënderuar publikun e zjarrtë:
“Faleminderit shqipet e USA!” – ka shkruar artistja, duke vijuar më tej me fjalë që burojnë drejt e nga zemra: “Mbrëmë kjo çupa nga Vlora ndau copëza shpirti me ju e ju me dashurinë tuaj m’a mbushët me dashurinë që gjithmonë ma jepni, sa herë jam mes jush.”
Një Bashkim i Madh Artistësh në “UNITED FESTIVALB”
Aurela ishte një nga xhevahiret e edicionit të sivjetshëm të “UNITED FESTIVALB”, një event madhështor që bëri bashkë shqiptarët përtej oqeanit. Pasi ka shprehur vlerësimin e saj për organizatorët me fjalët “Faleminderit United Festival për ftesën”, këngëtarja ka zbuluar edhe dimensionin e jashtëzakonshëm të këtij festivali të zhvilluar në stadium.
“Një eveniment i zhvilluar në stadium me më shumë se 25 artistë nga mbarë viset Shqiptare, secili me historinë e vetë mbi supe,”, ka nënvizuar ajo, duke vlerësuar peshën dhe rëndësinë e këtij bashkimi kulturor që tejkalon kufijtë gjeografikë.
Në mbyllje të mesazhit të saj, me të njëjtin entuziazëm që e karakterizon gjithmonë, Aurela ka ftuar publikun të mos e humbasë pjesën e mbetur të kësaj feste të madhe të artit shqiptar: “Sot akoma ju pret një ditë e bukur mes shumë artistësh që presin të ngjiten në skenë.”
Me stilin e saj unik, zërin potent dhe këtë paraqitje magjepsëse në të kuqe, “çupa nga Vlora” ka lënë një tjetër gjurmë të pashlyeshme në zemrat e diasporës në SHBA, duke vërtetuar se kudo ku ka shqiptarë, arti i saj mbetet një urë lidhëse e fuqishme dashurie dhe krenarie kombëtare.
Albert Vataj