Dolly Parton, ikona e muzikës amerikane ndahet nga jeta në moshën 80-vjeçare

Dolly Parton, një prej ikonave më të mëdha të muzikës country dhe një nga figurat më të dashura të kulturës amerikane, ka ndërruar jetë në moshën 80-vjeçare. Sipas një deklarate të familjes, ajo u nda nga jeta të martën, në shtëpinë e saj në Nashville, në paqe dhe pranë njerëzve të saj më të afërt. Lajmi u bë i ditur nga nipi i saj, Bryan Seaver. Familja ka njoftuar se ceremonia e lamtumirës do të jetë e vogël dhe private, me pjesëmarrjen vetëm të familjarëve.

Me një karrierë që zgjati më shumë se pesë dekada, Parton la pas një trashëgimi të jashtëzakonshme muzikore. Ajo shkroi mbi 3 mijë këngë, mes të cilave disa prej hiteve më të njohura të muzikës amerikane, si “Jolene”, “I Will Always Love You” dhe “Coat of Many Colors”. Kënga “9 to 5”, e lidhur me filmin ku ajo luajti, u kthye në një simbol për gratë dhe punëtorët amerikanë. Ndërkohë, bashkëpunimet e saj, përfshirë duetin “Islands in the Stream” me Kenny Rogers, e ndihmuan të shtrihej përtej muzikës country dhe të fitonte një audiencë të gjerë edhe në muzikën pop.

Gjatë karrierës së saj, Dolly Parton publikoi 49 albume dhe u nderua me 11 çmime Grammy. Por ndikimi i saj nuk u kufizua vetëm te muzika. Në vitet e mëvonshme, ajo iu përkushtua gjithnjë e më shumë bamirësisë. Përmes një prej projekteve të saj më të njohura, programit të bibliotekave për fëmijë, ajo kontribuoi në shpërndarjen e më shumë se 300 milionë librave në mbarë botën. Nga një fëmijëri e varfër në zonat rurale të Tennessee-s, Dolly Parton arriti majat e famës dhe u shndërrua në një simbol të muzikës, këmbënguljes dhe humanizmit amerikan. Trashëgimia e saj pritet të vazhdojë të jetojë përmes muzikës dhe veprës së saj bamirëse.