Ikona e muzikës pop në botë, Dua Lipa mund të rikthehet në skenën e Sanremos në një rol krejt të veçantë. Artistja shqiptare me famë ndërkombëtare nuk pritet të jetë thjesht një nga të ftuarat e edicionit 2027, por, sipas Adnkronos, po negociohet që ajo të jetë edhe bashkëprezantuese e një prej netëve të festivalit. Marrëveshja raportohet se është një nga objektivat kryesore të Stefano De Martinos për debutimin e tij si drejtor artistik dhe prezantues i Sanremos. Negociatat për praninë e këngëtares thuhet se kanë nisur tashmë.
Artistja shqiptare ka një histori të veçantë me festivalin italian. Ajo ishte e ftuar në Sanremo 2020, gjatë drejtimit të Amadeus, ku elektrizoi skenën me hitin “Don’t Start Now”, në një performancë spektakolare të shoqëruar nga tetë balerina. Për momentin, mbetet e paqartë se në cilën mbrëmje mund të shfaqet Dua. Në diskutim janë nata e parë, finalja, por edhe nata e re “Performance”, e cila lidhet me përzgjedhjen e përfaqësuesit të Italisë në Eurovision.
Lipa nuk është i vetmi emër i madh që po qarkullon për Sanremon e ardhshëm. Një tjetër figurë e njohur e televizionit italian, Maria De Filippi, është përfolur si kandidate për të bashkëprezantuar një nga netët. Nëse kjo marrëveshje realizohet, prania e De Filippit do të kishte edhe një domethënie personale për De Martinon. Pikërisht në “Amici”, programin e drejtuar prej saj, ai nisi rrugëtimin e tij televiziv në vitin 2009.
