Redjon Shtylla
“Tokë, zjarr, ujë, ajër, fole, shqiponjë”, janë këto disa nga elementët e video-klipit të këngës “Ktheju Tokës”, që përfaqëson Shqipërinë në “Eurovision Song Contest 2019”, i cili këtë vit mbahet në Izrael. Artistja Jonida Maliqi, me një zë drithërues, ashtu siç e kanë vlerësuar kritikët dhe fansat e Eurosong-ut, shfaqet e thjeshtë në këtë videoklip, pasi mesazhin e fortë që kënga ka, e përcjell me anë të elementëve të sipërpërmendur. Ajo shfaqet me një fustan ngjyrë bezh të punuar nga stilisti Ardi Asllani, me të cilin do të kurojë edhe veshjet e performancës në skenën e Tel Aviv-it. Maliqi ka ndryshuar dhe modelin e flokëve për këtë klip.
Klipi nis me Jonidën dhe më pas me folenë ku duken njerëz që lëvizin për të dalë, kjo simbolizion Shqipërinë dhe njerëzit që largohen dita-ditës. Në videoklip shohim fëmijët që vrapojnë larg “folesë”, pra shtëpisë së tyre që digjet dhe që prekin ujin (detin që ikin drejt vende të botës). Në disa pjesë shfaqet artistja Maliqi, që me efektet e erës bën thirrje për tu rikthyer tokës. E gjithashtu mund të shohim një fole shqiponje të mbushur me njerëz që presin të ushqehen e të rriten dhe në fund Jonida që zëvendësohet pikërisht me një shqiponjë.
Gjithashtu në fund të video-s por edhe në përshkrimin e Jonidës, bëhet me dije se e gjithë kjo nuk është veçse një parantezë e performancës së Shqipërisë në Eurovizion, që ende po ruhet si surprizë. Më herët Jonida ka treguar se këngën do ta mbajë në gjuhën shqipe, duke qenë se dhe vetë muzika përmban shumë elementë tradicionalë shqiptarë.
Kujtojmë që Eurovision Song Contest 2019, do të organizohet në Tel Aviv të Izraelit, për të shpallur fituesin mes 42 vendeve konkurruese në 18 maj. Në postimin e bërë në Instagram, Jonida ka shpjeguar se ky klip është vetëm një parantezë e performancës që do shfaqet në festival duke lënë të kuptohet se një suprizë akoma më e madhe po vjen. Këngëtarja pritet të këndojë në pjesën e dytë të natës së dytë gjysmëfinale, në datën 16 maj.
Çfarë mesazhi përcjell kënga?
Mesazhi kryesor është për krizën e emigracionit, që Shqipëria ka parë vitet e fundit. Elementët e tokës, zjarrit, ujit, ajërit dhe në fund të video-s të shqiponjës, lidhin mesazhin e këngës “Ktheju Tokës”. Kënga është një klithmë për mbarë fenomenin e emigracionit me të cilin po përballet Europa. Vetë artistja, e ftuar në emisione televizive, është shprehur se përveç migrimit, kjo këngë për të gjithë ne që jemi shkëputur nga toka jonë (personale), një thirrje për t’iu rikthyer origjinës sonë si njerëz, tek virtytet e humbura, tek të qenurit njerëzor. Jonida Maliqi e ka shprehur prej kohës ambicjen e saj për të marrë pjesë në këtë ngjarje të muzikës europiane. “Nuk e besoj dot! Falenderoj ata që e krijuan këtë këngë”tha mes emocionesh ajo kur u shpall fituese e festivalit të këngës në RTSH, festivali më i vjetër i muzikës së lehtë në Shqipëri.
Teksti i këngës
Ti këndon edhe qan
Në duar lotët mbledh, i mban
Një ditë jeton
Në tjetrën vdes
Sa mall, pak shpresë
I vetëm pa identitet
Ktheju tokës tënde
O njeri që zemrën le peng
Ktheju tokës tënde
Ti e di një zemër të pret
Një ditë jeton
Në tjetrën vdes
Sa mall, pak shpresë
I vetëm pa identitet
Ktheju tokës tende
O njeri që zemrën le peng
Ktheju tokës tënde
Ti e di një zemër të pret