“Euphoria” zbulon pamjet e para të sezonit të tretë, Sydney Sweeney me rol provokues

Pas një pritjeje gati katërvjeçare, HBO Max ka zbuluar pamjet e para nga sezoni i tretë i serialit të suksesshëm “Euphoria”. Historia e re zhvillohet pesë vite pas ngjarjeve të sezonit të dytë, duke treguar personazhe të transformuar dhe me zhvillime të reja.

Në qendër të vëmendjes është aktorja Sydney Sweeney, e cila do të portretizojë personazhin e saj si një “cam girl” dhe krijuese përmbajtjeje për platforma online si “OnlyFans”. Pamjet e publikuara e shfaqin Sweeney-n me dy veshje të ndryshme, përfshirë një bikini me motive rozë e të bardha dhe një korse të vogël, duke theksuar ndryshimin e thellë të rolit të saj në këtë dramë të njohur për tematika të forta dhe stilin provokues.

Ky interpretim shënon një kontrast të fortë me rolet e fundit të Sweeney në kinema, si ai i boksieres Christy Salters në filmin “Christy”, apo paraqitja e saj aktuale në filmin “The Housemaid”, i cili po korr sukses në arkat filmike. Aktorja ka qenë shpesh në qendër të vëmendjes mediatike kohët e fundit, si për paraqitjet publike, ashtu edhe për angazhimet e saj të shumta në televizion dhe kinema.

Sezoni i tretë i “Euphoria” pritet të jetë një nga premierat më të ndjekura dhe të diskutuara të HBO Max.