Filmi që do të përfaqësojë Shqipërinë në “Oscars 2023”

Ditën e djeshme, Qëndra Kombëtare e Kinematografisë në Shqipëri shpalli filmin i cili do të na përfaqësojë në edicionin e 95-të të Academy of Motion Picture Arts and Sciences, njohur ndryshe si çmimet Oscars.
“A cup of coffee and new shoes on”, me skenar dhe regji nga Gentian Koçi, do të garojë midis filmave të shteteve të tjera në kategorinë “Filmi më i Mirë i Huaj”.
Sipas deklaratës së QKK, filmi u përzgjodh midis dy prodhimeve të tjera të këtij viti: “Njëri prej nesh” nga regjisori Ergys Meta dhe “Shkëlqimi dhe rënia e shokut Zylo” nga Fatmir Koçi.
Kjo nuk është hera e parë që autori Gentian Koçi përfaqëson Shqipërinë në garën e çmimeve Oscars. Në vitin 2018 ai ishtë kandidatura zyrtare e Shqipërisë me filmin e tij debutues me metrazh të gjatë, “Dita zë fill”, film i cili u përzgjodh në mbi 50 festivale në të gjithë botën, duke rrëmbyer çmimet si “Aktorja më e mirë, “Skenari më i mirë”, dhe “Filmi më i mirë”.

Filmi artistik “Një filxhan kafe dhe këpucë të reja veshur” është financuar nga Qendra Kombëtare e Kinematografisë, Radio-Televizionit Publik Shqiptar, Qendra Greke e Filmit, Televizioni Publik Grek, Qendra Kinematografike e Kosovës, Instituti Portugez i Kinemasë dhe Audiovizualit, Eurimages, Media-Creative Europe dhe Bashkia e Tiranës, si dhe është realizuar në bashkëprodhim me Maria & Mayer (Portugali), Graal Films (Greqi) dhe Added Value Films (Kosovë).
Çfarë dimë mbi filmin?
“A cup of coffee and new shoes on” tregon historinë e dy vëllezërve binjakë të cilëve u duhet të përballen me një sëmundje të pashërueshme. Në rolet kryesore janë dy aktorët e njohur portugezë Edgar Morais dhe Rafael Morais. Filmi sjell dhe debutimin e aktores shqiptare Drita Kabashi.
Pak më shumë mbi regjisorin…

Gentian Koçi u diplomua për Regji Filmi në vitin 2009, në Tiranë. Në vitin 2012, ai realizoi xhirimet dhe regjinë e dokumentarit “Not a carwash”, i cili e pati premierën e tij si përzgjedhje zyrtare në festivalin Hot Docs, u nominua për Çmimin Special të Jurisë në Sheffield Doc/Fest, si dhe pati një vlerësim të madh nga kritikët në Sight & Sound.
Në vitin 2017, Gentian Koçi përfundoi filmin e tij të parë me metrazh të gjatë “Dita zë fill”, si producent, regjisor dhe skenarist. Ky film pati premierën botërore në Festivalin Ndërkombëtar të Filmit të Sarajevës, ku aktorja kryesore u nderua me çmimin Heart of Sarajevo si “Aktorja më e Mirë”.
Më shumë se sa një Oscar…
Kategoria e filmit më të mirë të huaj në Oscars është konsideruar gjithmonë një fitore e shtetit më shumë se sa e vetë filmit. Vendi i huaj më i vlerësuar është Italia, me 14 çmime të fituara (përfshirë tre çmime speciale) dhe 29 nominime, ndërsa Franca është vendi i huaj me më shumë nominime (37 për 12 fitore, duke përfshirë tre çmime speciale). Izraeli është vendi i huaj me më shumë nominime (10) pa fituar asnjë çmim, ndërsa Portugalia ka më shumë aplikime (34) pa nominim. Në vitin 2020, përfaqësuesi i Koresë së Jugut, filmi “Parasite” u bë fituesi i parë ndërkombëtar i filmit artistik dhe filmi i parë jo-anglisht-folës në përgjithësi, që fitoi gjithashtu në kategoorinë e “Filmit më të mirë”.