Gjesti po vijon të jetë në qendër të vëmendjes me aktivitetin e tij muzikor, ndërsa së fundmi ka publikuar këngën “Gasolina” në bashkëpunim me Dhurata Dorën. Krahas projekteve të reja, artisti ka qenë aktiv edhe në skenë me performanca të ndryshme.
Në një tjetër zhvillim në karrierën e tij, Gjesti nuk është më pjesë e Three60 Music dhe nuk bashkëpunon më me menaxherin Bonart Ajvazi. Ndarja mes palëve raportohet të ketë ndodhur gjatë muajit qershor, përpara nisjes së sezonit veror dhe pas përfundimit të Alba Festival.
Bashkëpunimi mes Gjestit dhe Three60 Music ishte bërë publik më 7 maj 2025, pak javë pasi ai u shpall fitues i “Big Brother VIP Albania”. Në atë kohë, kompania njoftoi se artisti i ishte bashkuar ekipit të saj nën SGM Management, duke e prezantuar marrëveshjen si një kapitull të ri në karrierën e tij.
Gjatë periudhës së bashkëpunimit, Gjesti solli disa projekte muzikore, mes tyre “Veshu Ndrequ”, ndërsa në maj të këtij viti publikoi edhe EP-në “Sound i Ri”. As Gjesti dhe as Three60 Music nuk kanë bërë një njoftim publik për ndarjen apo për arsyet që çuan në përfundimin e marrëdhënies profesionale.