Gjesti fiton betejën, lirohet mes bujës së madhe

Mes një buje të madhe dhe të një vëmendje të lartë, Gjesti është liruar nga paraburgimi, një javë pas arrestimit të tij në Prishtinë. Artisti shumë i dashur nga publiku, ishte arrestuar më herët nën dyshimin për “armëmbajtje pa leje”, ndërsa pas intervistimit ishte dërguar fillimisht në mbajtje për 48 orë. Më pas, ndaj tij ishte caktuar masa e paraburgimit prej një muaji nga Gjykata Themelore në Prishtinë, me kërkesë të Prokurorisë.

Sipas dyshimeve të ngritura, ai akuzohej për disa vepra penale, përfshirë “Kanosje”, “Asgjësim apo dëmtim të pasurisë” si dhe “Mbajtje në pronësi, kontroll ose posedim të paautorizuar të armëve”. Ndaj tij është ndryshuar masa e sigurisë, duke u liruar për t’u mbrojtur në procedurë të rregullt. Rasti ndaj këngëtarit pritet të vazhdojë në organet e drejtësisë.

Avokatët e tij, Artan Qerkini dhe Burim Azemi janë shprehur se në bazë të nenit 159 të Kodit të Procedurës Penale të Republikës së Kosovës, i cili përcakton parimin e proporcionalitetit në caktimin e masave të sigurisë, paraburgimi s’ka qenë masë proporcionale. Në llogarinë zyrtare të Gjestit në Instagram, nuk ka ende asnjë reagim.