Gra që vr*ten, Tayna: Mentalitetin në Kosovë e kemi disa shekuj mbrapa, ende ka ”sulltanë” pa perandori

Tayna ka reaguar pas rasteve të vrasjeve të grave në Kosovë dhe protestës së mbajtur kundër dhunës ndaj femicidit. Përmes një reagimi në rrjetet sociale, artistja ka kritikuar mentalitetin patriarkal dhe mënyrën sesi ndër breza kontrolli ndaj grave është normalizuar dhe është interpretuar si “burrëri”, posesiviteti si “dashni”, ndërsa egoja si autoritet.

“Patriarkalizmi është një gjenerational curse që s’po mundemi ta thyejmë”, shkruan Tayna, duke theksuar kontrastin mes përparimit teknologjik dhe realitetit me të cilin përballen gratë. “Teknologjia ka avancuar aq shumë saqë po flasim për robotë e makina fluturuese, e na hala po protestojmë për të drejtën e një gruaje me jetu”, shprehet ajo.

Postimi i plotë

Patriarkalizmi është një gjenerational curse që s’po mundemi ta thyejmë. Teknologjia ka avancuar aq shumë saqë po flasim për robotë dhe makina fluturuese, e ne ende po protestojmë për të drejtën e një gruaje për të jetuar.

Për gjenerata, kontrollin e kemi quajtur burrëri, posesivitetin dashuri dhe egon autoritet. Ndoshta problemi nuk është që gratë janë bërë “shumë të forta”, por që disa ende nuk kanë mësuar të bashkëjetojnë me gra që nuk mund t’i kontrollojnë.

E këta kanë mbetur “sulltanë” pa perandori, me mendësinë: “Unë jam burri këtu.”

Nuk mund ta quash veten shoqëri moderne kur teknologjinë e ke në vitin 2026, ndërsa mentalitetin disa shekuj mbrapa.

Frika nga ligji nuk e shëron mentalitetin, por mund të shpëtojë jetë derisa shoqëria ta shërojë atë.