Kënga ”Akull” e vjedhur? Capital T tregon të vërtetën

Në një intervistë për emisionin “Ndrrimi i natës” në Klan Kosova, Capital T foli ndër të tjera edhe për këngën e tij të fundit, “Akull”, e cila u diskutua së tepërmi pak kohë më parë për shkak të ngjashmërisë me një këngë të njohur indiane. ”Akull” përkonte me kolonën zanore të filmit të njohur të Bollywood-it, “Ek Villain”. Pak ditë pas publikimit, kompania muzikore që gëzonte të drejtën e kolonës zanore të “Ek Villain”, T-Series, bllokoi këngën e reperit duke shtuar dyshimin se kënga ishte realisht e vjedhur.

“Kemi pasur një problem, realisht. Ka qenë kolona zanore e një filmi indian. Unë nuk e kam ditur kur e kam blerë këngën nga producenti”,-tha Capital T në NIN. “Nuk e kam ditur se e ka përdorur në atë mënyrë ose nuk kishte marrë leje. Kështu që kompania në fjalë që kishte të drejtat për atë këngë, një ndër kompanitë më të mëdha në YouTube, e bllokoi dhe më dërguan email ku u prezantuan se kush ishin dhe pse e bllokuan këngën”.

T-Series bllokoi këngën “Akull” më 25 nëntor, një ditë para tërmetit tragjik në Shqipëri. Për shkak të situatës së krijuar, Capitali e pati të pamundur të kontaktonte menjëherë me kompaninë në fjalë.

“Në ato momente ndodhi tërmeti në Shqipëri dhe isha atje duke u marrë me aksionet atje dhe nuk kisha kohë t’u ktheja email. Por u ktheva [në Kosovë] kontaktuam dhe u morëm vesh. Këto janë gjëra që ndodhin në gjithë botën”. 26 ditë pas premierës, “Akull” numëron momentalisht më shumë se katër milionë klikime.