Labinot Tahiri apel humanitar për Gani Kocin: Barnat kushtojnë mijëra euro, sot synojmë t’i mbledhim 50 mijë euro

Këngëtari i njohur Labinot Tahiri ka bërë një apel publik për të mbështetur financiarisht Gani Kocin, për të cilin po zhvillohet një fushatë humanitare në GofundMe për sigurimin e barnave kundër kancerit. Përmes një postimi në rrjetet sociale, Tahiri ka bërë të ditur se donacionet nga qytetarët shqiptarë dhe diaspora po ecin shumë mirë, ndërsa ka ftuar të gjithë që të kontribuojnë, me qëllim që familjes së Gani Kocit t’i sigurohen sa më shpejt mjetet e nevojshme për trajtimin. Sipas tij, barnat që i nevojiten Gani Kocit kushtojnë rreth 3.000 euro secila dhe nuk sigurohen në Kosovë.

Postimi i plotë

Popull i dashur, ju e dini që, kur e marr një punë, e çoj deri në fund. Prandaj, jam shumë i lumtur që donacionet e përbashkëta nga të gjithë shqiptarët dhe diaspora jonë për z. Gani Kocin po shkojnë shumë, shumë mirë.

Ju lutem që për këtë atdhetar, çlirimtar e shqiptar, i cili vuajti shumë nga të këqijat e Serbisë, ta ndihmojmë në afat rekord, që t’i sigurohen familjes paratë për blerjen e barnave kundër kancerit, të cilat i kushtojnë nga 3.000 euro për shërimin e bacës Gani. Këto barna nuk sigurohen në Kosovë, sepse nuk ka as për nënën time dhe as për babanë tim e tëndin. Ky është fati i Kosovës!  Po lutem që sot të tubohen 50.000 euro.

Disa persona më kanë shkruar edhe në privat, por paratë ju lutem dërgojini drejtpërdrejt te familja. Respekt. Baca Gani, uroj që së shpejti të dalim në drekë dhe t’ia themi ndonjë kënge për lirinë e trojeve tona shqiptare. Me dashuri e respekt për ty dhe shokët e ilegales që kontribuuat për ne, Labi, Kosovë e Shqipërisë.