Shtatori po afron dhe televizionet shqiptare po bëhen gati për një sezon të ri. Si çdo vit, nuk mungojnë ndryshimet, rikthimet dhe emrat e rinj që pritet të shfaqen në ekran. Një nga programet që pritet të ketë ndryshime është “Për’puthen”. Megi Pojani nuk do ta drejtojë më programin. Në vend të saj pritet të jetë Heidi Baci, ndërsa Ronaldo Sharka mund të marrë drejtimin artistik të formatit. Për opinionistë përmenden Arjan Konomi dhe Erjola Doçi. Megi, megjithatë, pritet të rikthehet në Top Channel në janar me një projekt të ri.
Një rikthim i rëndësishëm pritet të jetë ai i Agron Llakajt, i cili thuhet se do të rikthehet në Top Channel dhe në “Portokalli”. Ndërkohë, zërat për një rikthim të Xhemi Shehut në këtë program ose në “Fiks Fare” nuk konfirmohen. Edhe “Fiks Fare” pritet të ketë ndryshime të mëdha. Pas shumë vitesh, Filip Çakulli raportohet se do të largohet nga programi, ndërsa është përfolur edhe largimi i Jul Dedës. Për momentin, ende nuk dihet se kush do ta marrë drejtimin e formatit.
Bora Zemani mbetet një tjetër emër për të cilin ka shumë diskutime. Ajo është përfolur për një largim nga Top Channel dhe për një kalim të mundshëm te Vizion Plus, ku mund të drejtojë “Dancing with the Stars”. Megjithatë, deri tani nuk ka një kontratë të konfirmuar. Ndryshime priten edhe te “Goca dhe Gra”. Selin Bollati, fituesja e “Big Brother VIP Albania”, pritet t’i bashkohet panelit, ndërsa Sherina Spahiu duket se nuk do të vazhdojë më në program.
Te “Në Shtëpinë Tonë”, Julka Gramo nuk pritet të vijojë moderimin. Në vend të saj është përmendur Arjola Shehu. Prania e saj e shpeshtë në studiot e Top Channel ka nxitur gjithashtu zërat për një projekt të ri mëngjesi, ku mund të jenë pjesë edhe Alban Musa dhe Arjon Muça. Një tjetër emër që rikthehet në qendër të vëmendjes është Luana Vjollca. Prej kohësh flitet për një rikthim të saj në Top Channel dhe madje për një version të ri të “Shiko Kush Luan”. Megjithatë, deri tani nuk ka një konfirmim zyrtar.
Zyrtare është që Luiz Ejlli do të drejtojë “Live me Luizin”, një format i ri që do të ketë muzikë live, intervista, lojëra, humor dhe performanca. Sa i përket Arbana Osmanit, burimet bëjnë me dije se ajo nuk pritet të rikthehet në Top Channel. Në Vizion Plus, ndërkohë, pritet të vazhdojë me “Ferma VIP”. Për “Big Brother VIP Albania 6”, lajmi duket më i qartë: programi pritet të nisë në tetor ose në fillim të nëntorit dhe sërish do të drejtohet nga Ledion Liço.
Ndryshime ka edhe te platforma multimediale Andale, ku disa prej personazheve nuk do të jenë më pjesë e projekteve të reja. Megli, Klea, Blerta dhe Bernardi janë larguar. Largimet kanë ngritur pikëpyetje për vijimësinë e disa formateve, sidomos “G.O.A.T.S” dhe “Pa Manual”. Në të njëjtën kohë, Andale ka hapur audicione për personazhe të rinj, çka tregon se platforma po përgatitet për një rifreskim të kastit dhe të formateve në sezonin e ri.
Edhe Alketa Vejsiu është përmendur si një emër që mund të afrohet me Top Channel pas paraqitjes së saj në “Big Brother VIP”. Megjithatë, nuk ka ende konfirmim për një projekt të ri apo për largimin e saj nga TV Klan. Në Vizion Plus priten gjithashtu lëvizje. Fjodora Fjora raportohet se do të rikthehet në ekran, ndërsa Pranvera Borakaj pritet të largohet. Televizioni mund të sjellë gjithashtu sezonin e ri të “Dancing with the Stars”. Edhe RTSH po përgatitet për një sezon me ndryshime. Në diskutime janë përmendur emra si Eva Murati, Arvin Kita, Klotilda Harka, Matilda Terpollari, Bojken Lako, Gjergj Kaçinari dhe Alba Çobaj. Për programet e mbrëmjes priten më shumë spektakle muzikore dhe artistike. /Anabel.al/