Pas 16 vitesh larg skenës ku nisi një nga kapitujt më të rëndësishëm të karrierës së tij, Agron Llakaj rikthehet në “Portokalli”. Këtë herë, humoristi nuk do të jetë vetëm pjesë e kastit të aktorëve, por do të marrë edhe drejtimin e spektaklit të humorit në Top Channel. Llakaj do të rikthehet përballë publikut si moderator dhe aktor, ndërsa rikthimin në program e ka shoqëruar me një metaforë plot humor, duke e cilësuar si “rikthimi i Odisesë”.
“Me mbështetjen e Lorit dhe Top Channel, mendoj se kemi të gjitha mundësitë që ‘Portokalli’ të rimarrë ngjyrimin e atij që e themeloi, që i vuri këtë emër kaq të bukur. Unë isha i pari që erdha dhe ky rikthimi im është si rikthimi i Odisesë”, është shprehur ai.
Agron Llakaj u largua nga “Portokalli” në vitin 2010, për të vijuar më pas rrugëtimin e tij televiziv në disa formate të tjera. Ai drejtoi fillimisht “Kush do të bëhet milioner”, ndërsa nga viti 2012 deri në vitin 2019 ishte pjesë e “Al Pazar” si autor, regjisor, skenarist dhe aktor.
Më vonë, Llakaj vijoi me formatin satirik “Fake Off” në Vizion Plus. Tashmë, pas më shumë se një dekade e gjysmë, një prej figurave ikonike të humorit shqiptar rikthehet në skenën e “Portokalli”-s, këtë herë me një rol edhe më të gjerë në drejtimin dhe përmbajtjen e spektaklit.