Publiku foli, Londrim Mekaj fiton Big Brother VIP Kosova 4

Lajme Showbiz E Shtunë, 28 Shkurt 2026 02:24

Finalja e madhe e Big Brother VIP Kosova 4 ka kulmuar me shpalljen e fituesit të edicionit të katërt. Londrim Mekaj është shpallur zyrtarisht fitues i këtij sezoni, duke rrëmbyer çmimin e madh prej 200 mijë eurosh pas një gare intensive dhe një rrugëtimi mbi 100-ditor brenda shtëpisë më të famshme në vend. Banori më i ri i këtij edicioni arriti të fitojë mbështetjen vendimtare të publikut në natën finale, duke lënë në vend të dytë Elijona Binakajn.

Finalja e madhe u zhvillua në prani të pesë finalistëve: Ludo Lee, Elijonës, Londrimit, Klodit dhe Hygertës të cilët arritën deri në fund të garës pas një rrugëtimi disamujor brenda shtëpisë. Emri i fituesit u shpall gjatë momentit përmbyllës të mbrëmjes, ndërsa Londrimi reagoi mes emocionesh duke falenderuar Zotin, familjen, produksionin për “eksperiencën e paharrueshme” dhe publikun për mbështetjen.

“Kushdo që ka dëshirën të jetë pjesë e këtij formati, t’i jepet mundësia dhe ta shijojë në maksimum, është një prej eksperiencave më të bukura. Kam përjetuar lloj-lloj emocionesh, kam krijuar shoqëri, kam krijuar raporte të mira, momente që s’kam për t’i harruar kurrë dhe jam falenderues sa të kem shpirtin gjallë. Ju dua pafund,” u shpreh ai pas shpalljes së rezultatit.

Finalistët e tjerë përfunduan rrugëtimin e tyre në finale, duke u renditur kështu: në vendin e pestë Hygerta, në vendin e katër Klodi, në të tretin Ludo Lee dhe në të dytin, Elijona.