”Sholina dhe babi Toni”, fituesja e BBVA5 ndan me ndjekësit një copëz nga ditari i saj i ri

Selin Bollati, fituesja e ”Big Brother Albania Vip 5” me ndjekësit ka ndarë një copëz nga një ditar shumë i shtrenjtë për të. Ajo ndodhet jashtë Shqipërisë, ku ka kaluar ditë të çmuara pranë babait të saj. Një takim që duket se nuk ka qenë thjesht një udhëtim, por një rikthim i ndjenjave, i kohës së humbur dhe i lidhjes që as largësia dhe as rutina nuk mund ta zbehin.

Gjatë kohës së spektaklit, mungesa e babi Tonit në studio dhe komunikimi i kufizuar vetëm përmes telefonit kishte ngritur kureshtje dhe pyetje te publiku. Por Selin zgjodhi të mos ushqejë spekulime, duke e mbyllur këtë kapitull me thjeshtësinë e një të vërtete të qetë: disa lidhje nuk kanë nevojë për shpjegime, sepse flasin vetë përmes pranisë dhe ndjenjës.

Në Instagram, ajo ka ndarë disa imazhe nga ky udhëtim i veçantë. Në to, babai i saj, Toni, shfaqet duke ecur në një rrugicë me kalldrëm diku në një qytet europian, i zhytur në ritmin e ngadaltë të një dite të zakonshme që për ta është gjithçka tjetër veçse e zakonshme.  “Sholina dhe Babi Toni! Këto dy ditë shijuam një pushim të shkurtër, por shumë të nevojshëm. Faleminderit për çdo mesazh që më keni dërguar. I shijuam shumë këto ditë bashkë dhe ju kemi lexuar të gjithëve. Ju duaaa shumë”, ka shkruar ajo.