Një vajzë shqiptare nga Kosova është kthyer në qendër të vëmendjes në sezonin e dytë të reality show-t britanik “Love is Blind UK”, pasi vendimi i saj në momentin më të rëndësishëm la të gjithë publikun dhe partnerin e saj në shok.
Bardha, një nga konkurrentet më të komentuara të këtij edicioni, krijoi një lidhje të fortë me Jed-in, një djalë me rrënjë libaneze. Që brenda pod-eve ata ndanë histori të ngjashme dhe plane të mëdha për të ardhmen. Bardha shpesh tregonte se si fëmijëria e saj e vështirë, pas largimit të familjes nga lufta në Kosovë, e kishte bërë të fortë dhe të pavarur, një cilësi që Jed e admironte shumë.
Pas daljes nga eksperimentimi dhe fillimit të bashkëjetesës, marrëdhënia e tyre dukej solide, por tensionet nisën të shfaqeshin. Një moment i vogël, por domethënës, ishte kur Bardha pagoi faturën e një darke, gjë që e bëri Jed-in të ndihej i pavlerësuar, ndërsa ajo vetë theksoi se pavarësia nuk duhej parë si pengesë në dashuri.
Pavarësisht këtyre mosmarrëveshjeve, çifti vendosi të shkonte deri në altar. Por pikërisht aty ndodhi surpriza e madhe.
Atmosfera ishte e mbushur me emocione. Jed shprehu dashurinë dhe besimin e tij për të ardhmen e tyre së bashku. Mirëpo, kur erdhi radha e Bardhës për zotimet, ajo shpërtheu në lot dhe me zë të dridhur tha:
“Nuk është një ‘jo’ për ty, por një ‘jo’ për momentin. Dua të bëj gjithçka që kemi premtuar, por kur të jemi të dy plotësisht gati.”
Ky vendim e la Jed-in të tronditur dhe të lënduar, ndërsa Bardha u largua e përlotur, e ngushëlluar nga familja e saj.
Reagimet e publikut britanik ishin të ndara: një pjesë e kritikuan shqiptaren për hezitimin, ndërsa shumë të tjerë e përgëzuan për guximin për të mos thënë një “po” të nxituar vetëm për kamerat.
Nga katër çiftet që mbërritën deri në altar në këtë sezon, tre u martuan, ndërsa vetëm Bardha dhe Jed zgjodhën të mos e kurorëzonin lidhjen.
Historia e tyre, megjithatë, mbetet e hapur. Bardha la të kuptohet se nuk është fundi, por një shtyrje për momentin e duhur, duke lënë hapësirë që marrëdhënia e tyre të vazhdojë në të ardhmen.