Sonte do të mbahet nata e dytë e Eurovisionit dhe Shqipëria përfaqësohet nga Alis me këngën ”Nan”. Për shkak se publiku brenda territorit shqiptar nuk mund të votojë, e gjithë vëmendja dhe shpresa për kualifikim në finale mbetet te votat e shqiptarëve që jetojnë jashtë vendit. Për t’ia bërë sa më të lehtë diasporës, më poshtë gjendet një udhëzues praktik me të gjitha linqet e drejtpërdrejta të votimit sipas shteteve. Procesi i votimit është i thjeshtë, por kërkon vëmendje në oraret e përcaktuara.
Kodi i votimit
Për të votuar për Shqipërinë, duhet të dërgoni SMS me tekstin: 13.
Orari
Dritarja e votimit hapet menjëherë pas performancës së fundit (sipas skaletës, rreth orës 22:30 – 22:45) dhe qëndron e hapur për vetëm 18 minuta.
Kufiri
Çdo numër celulari mund të dërgojë deri në 10 SMS. Është thelbësore që mbështetësit e Alis të presin sinjalin zyrtar të hapjes së televotimit gjatë transmetimit live. Çdo votë e dërguar jashtë dritares prej 18 minutash, nuk llogaritet, ndaj saktësia është po aq e rëndësishme sa dëshira për të mbështetur Shqipërinë.
Platforma Online për shtetet e tjera
Për të gjithë shqiptarët që jetojnë në shtete që nuk marrin pjesë në Eurovizion, apo në shtete specifike si Mbretëria e Bashkuar, Australia dhe Luksemburgu, votimi kryhet përmes internetit. Mjafton të aksesoni platformën zyrtare www.esc.vote.
Kënga “Nan” sjell një mesazh emocional dhe të fuqishëm mbi figurën e nënës në familjen shqiptare, duke ndërthurur motive moderne me elemente autentike shqiptare. Paraqitja skenike e aktores së madhe Rajmonda Bulku është një tjetër suprizë. Kryeministri Edi Rama ka bërë thirrje publike për mbështetjen e përfaqësuesit shqiptar në Eurovision Song Contest 2026, përmes një mesazhi drejtuar shqiptarëve jashtë vendit. Rama u bëri apel qytetarëve që të votojnë për Shqipërinë me numrin 13, duke theksuar rëndësinë e mbështetjes së artistit shqiptar në një nga skenat më të mëdha muzikore në Evropë.
