“Thikat e mia”, për herë të parë “Këngën Magjike” e fiton një artist i ri (VIDEO)

Kënga Magjike e këtij viti ishte ndryshe. Për herë të parë festivali nuk u mbajt në Pallatin e Kongreseve, por në skenën e së “Dielës Shqiptare”. Për herë të parë, fitues është një artist i ri, edhe pse ka vite në skenë. Alban Ramosaj u shpall fitues me një diferencë të madhe votash mbrëmjen e djeshme.

“Thikat e mia”, një kompozim nga studio e “Three Dots” dhe nga vetë artisti, rrëmbeu zemrat e të gjithëve, ndaj dhe u shpall si kënga fituese. Çdo vit jemi mësuar që fitues del një artist që ka vite në skenë dhe këtë vit Albani e theu “rregullin”.

Gjatë gjithë procesit të votimit, Albani dukej i hutuar dhe me vështirësi mbante lotët. Pasi mori çmimin nga fituesja e edicionit të kaluar, Eneda Tarifa, Ramosaj falenderoi bashkëpunëtorët dhe në veçanti të ëmën. “Kjo është për ty mam, për çdo gjë që ke bërë për mua”, tha ai. Në vendin e dytë u renditën Flori Mumajesi dhe Klajdi Haruni me këngën “E para”, ndrësa në të tretin artistja nga Gjerorgjia Nutsa.