Kriza e Milanit në kampionatin italian ka arritur një pikë alarmante, duke hyrë në histori për një statistikë që nuk ishte regjistruar kurrë më parë në 126 vite ekzistencë të klubit.
Në barazimin ndaj Sassuolo-s, kuqezinjtë konfirmuan një rekord negativ të paprecedentë: vetëm 1 gol i shënuar në 5 ndeshjet e fundit në Serie A. Një shifër që pasqyron qartë vështirësitë e mëdha në repartin ofensiv.
Goli i vetëm në këtë seri erdhi nga Adrien Rabiot në sfidën kundër Hellas Veronës. Në katër përballjet e tjera, ndaj Napolit, Udineses, Juventusit dhe sërish Sassuolos, Milani nuk arriti të gjejë rrugën e rrjetës.
Kjo ecuri e dobët ka nxjerrë në pah një problem të theksuar që ka shoqëruar skuadrën gjatë gjithë sezonit: mungesën e efikasitetit në sulm. Pavarësisht traditës së pasur dhe historisë së mbushur me trofe, “Djalli” po kalon një nga periudhat më të zbehta në aspektin sulmues. Në këto kushte, drejtuesit e klubit, me në krye Igli Tare, pritet të ndërhyjnë fuqishëm në merkato.