Mbrojtësi kuqezi, Elseid Hysaj doli këtë të premte në konferencë për shtyp në prag të sfidës miqësore ndaj Luksemburgut, duke vlerësuar kundërshtarin dhe duke theksuar se kuqezinjtë duhet të tregohen maksimalisht të përqendruar për të marrë rezultatin e dëshiruar. Ai tha se futbolli ka ndryshuar ndjeshëm dhe se nuk ekzistojnë më skuadra të lehta, pavarësisht emrit apo historisë së tyre.
”Çdo ekip ka bërë përparim dhe duhet respektuar. Kemi analizuar kundërshtarin me stafin teknik dhe po punojmë për të korrigjuar disa mangësi që u shfaqën në ndeshjen e fundit. Duhet të jemi më të përqendruar se kundërshtari për të fituar”, deklaroi Hysaj. Futbollisti foli edhe për atmosferën brenda ekipit pas ardhjes së trajnerit të ri, duke vlerësuar energjinë dhe filozofinë që ai po përpiqet të sjellë në skuadër. Sipas tij, grupi është i motivuar dhe po përshtatet me kërkesat e reja tekniko-taktike, ndërsa objektivi mbetet ndërtimi i një skuadre konkurruese për sfidat e ardhshme.
Duke komentuar problemet në finalizim që u panë në takimin e fundit, Hysaj theksoi se krijimi i rasteve është një sinjal pozitiv dhe se sulmuesit kanë nevojë për mbështetje dhe besim. ”Duhet të qëndrojmë pozitivë. Rastet po krijohen dhe golat do të vijnë. Sulmuesit tanë kanë cilësi dhe duhet të luajnë pa presion”, tha ai.
Mbrojtësi kuqezi nuk fshehu ambiciet për të ardhmen, duke deklaruar se ëndrra e tij është që Shqipëria të sigurojë një tjetër kualifikim në Kampionatin Europian dhe të synojë sukses edhe në Ligën e Kombeve. Ndeshja ndaj Luksemburgut mund të ketë edhe një domethënie të veçantë për Hysajn. Nëse aktivizohet, ai do të regjistrojë paraqitjen e 100-të me fanellën e Kombëtares shqiptare. “Do të ishte një moment i jashtëzakonshëm për mua. Që fëmijë kam ëndërruar të luaj për Kombëtaren dhe të arrij në 100 ndeshje është një krenari e madhe”, përfundoi mbrojtësi shqiptar.