12 gola dhe 5 asiste, Trabzonspori ende nuk ka paguar kartonin e Muçit

Ernest Muçi do të vijojë të mbetet i huazuar te Trabzonspori, të paktën deri në fund të sezonit, ndërsa drejtuesit e klubit turk nuk kanë marrë ende një vendim përfundimtar mbi të ardhmen e sulmuesit shqiptar. Presidenca ka zgjedhur të mos nxitohet, duke shtyrë çdo vendim për muajt e ardhshëm.

Ndryshe nga drejtuesit, trajneri Fatih Teke dhe stafi i tij teknik po ushtrojnë presion që kartoni i Muçit të blihet sa më shpejt nga Beşiktaşi. Sipas raportimeve të “SuperHaber” në Turqi, bindja e stafit teknik është se një transferim i përhershëm do të ndihmonte në ruajtjen dhe rritjen e formës së jashtëzakonshme që po kalon lojtari.

Shifrat e Muçit flasin qartë: 12 gola dhe 5 asistime në më pak se tre muaj aktivizim, duke u kthyer në një nga elementët më vendimtarë të skuadrës. Sipas stafit të Trabzonsporit, garantimi i së ardhmes së tij para përfundimit të sezonit do të kishte ndikim të drejtpërdrejtë në performancë.

“Nëse tarifa e transferimit paguhet para mbylljes së sezonit, rendimenti i Muçit do të rritet dhe vazhdimësia e tij do të jetë e garantuar,” citohet të ketë thënë stafi teknik.

Muçi u transferua te Trabzonspori në formë huazimi për 1 milion euro. Për ta blerë përfundimisht kartonin e tij, klubi duhet të derdhë edhe 8.5 milionë euro të tjera. Megjithatë, presidenti Ertuğrul Doğan mbetet i kujdesshëm dhe nuk po nxitohet, duke lënë gjithçka të hapur për vendimin final në fund të sezonit.