39 gola në vetëm 9 ndeshje, Barcelona e Flick është një makineri perfekte

Kush mund ta ndalë Barcelonën? Kjo është pyetja që po qarkullon gjithnjë e më shumë në botën e futbollit, pas nisjes fantastike të sezonit nga skuadra e Hansi Flick. Katalanasit kanë fituar të tetë ndeshjet e para në La Liga, si dhe debutimin në Champions League, duke regjistruar shifra mbresëlënëse.

Në nëntë takime, Barcelona ka shënuar plot 39 gola, me një mesatare prej 4.33 golash për ndeshje. Protagonisti kryesor është braziliani Raphinha, i cili, i vendosur në qendër të sulmit, ka realizuar 14 gola në tetë ndeshjet e para.

Krahas tij, rëndësi të veçantë kanë Lamine Yamal, Pedri, Dani Olmo dhe Cubarsí, pjesë e një grupi që po kombinon talentin me efikasitetin përpara portës.

Fitorja 3-0 ndaj Getafes i lejoi Barcelonës të barazonte rekordin e klubit, të vendosur nga skuadra e Gerardo Martinos në sezonin 2013-2014, me tetë fitore radhazi në startin e kampionatit. Me 24 pikë, katalanasit kryesojnë me pesë pikë avantazh ndaj Atlético Madridit dhe Betisit, ndërsa Real Madridi është gjashtë pikë prapa.

Objektivi i radhës është rekordi spanjoll i nëntë fitoreve radhazi në start të La Ligës, i vendosur nga Reali në vitin 1968. Përpara sfidës me Betisin, Barcelona do të përballet me Galatasarayn në Stamboll, pas triumfit 5-1 ndaj Feyenoordit në Champions.

Trofeu europian mbetet ëndrra e madhe e Flick, pasi Barcelona nuk e fiton që prej vitit 2015. Pas eliminimeve nga Interi dhe Atlético Madridi në dy edicionet e fundit, katalanasit synojnë rikthimin në majën e Europës.