4 sulmues në garë për “Këpucën e Artë” në Kombëtaren tonë!

Kombëtarja jonë në vitet e fundit, në shpesh raste ka pasur probleme për gjetjen e golit, edhe për shkak të mungesës së sulmuesve që e njohin mirë portën. Në dy sezonet e fundit, numri i bomberave që spikasin në kampionate të një niveli shumë të mirë në Europë është bërë gjithnjë e më i madh.

Myrto Uzuni është një nga më të spikaturit, edhe pse nuk luan si sulmues i parë. Sulmuesi i kombëtares ka realizuar deri tani 10 herë për Ferencvaros në elitën e futbollit hungarez, duke qenë edhe i vetmi nga kuqezinjtë që e ka këtë numër me dy shifra. Edhe pse nuk mund të pretendojë të jetë “Këpuca e Artë” e Superligës së Hungarisë, sërish shqiptari mund të ngjitet deri në vendin e dytë që e mban Gazdag i Honvedit me 13. 25-vjeçari beratas mund të fitojë në fund të sezonit një “Këpucë të Artë” simbolike mes lojtarëve të Shqipërisë.

Pas Uzunit janë dy sulmues me nga 9 gola. Armando Broja po shkëlqen në Superligën e Holandës në radhët e Vitesse, duke qenë zbulimi i sezonit dhe një nga lojtarët më të mirë të ekipit. Falë edhe golave të tij, Vitesse është në vendin e katërt në renditje duke lënë pas Fejënordin e duke pretenduar kualifikimin për në kupat europiane për sezonin e ardhshëm. Gjithashtu, 19-vjeçari është në finalen e Kupës përballë Ajax.

Rey Manaj është gjithashtu në formë tek Barcelona B, duke shënuar 9 gola në pretendim për t’u ngjitur në Ligën e dytë të Spanjës. Sulmuesi 24-vjeçar ka marrë vlerësime në të kaluarën edhe nga Leo Mesi, dhe mbetet një lojtar në konsideratë të trajnerit të ekipit të parë, Ronald Koeman.

Futbollisti tjetër i dalluar i kombëtares lidhur me tundjen e rrjetës është Eduart Rroca. Mesfushori nga Librazhdi po shkëlqen në sezonin e tij të parë me Istanbulsporin në Ligën e Parë të Turqisë, ku ka shënuar 8 gola e ka shërbyer 12 asistë. Ky i fundit edhe pse po kalon një formë fantastike, sërish nuk ka mundur që të marrë një ftesë për në Kombëtare.