5 gola në 2 ndeshje, Malen e ka nisur në mënyrë spektakolare sezonin në Seria A

Donyell Malen ka nisur në mënyrën më spektakolare të mundshme aventurën e tij me Romën në Serie A. Sulmuesi holandez ka shënuar pesë gola në vetëm dy ndeshjet e para, duke barazuar një rekord që nuk ishte prekur prej gati tre dekadash.

Malen debutoi me një paraqitje të jashtëzakonshme në fitoren 4-0 të Romës ndaj Fiorentinës, ku realizoi një tripletë. Në javën e dytë, holandezi vazhdoi spektaklin, këtë herë me një dopietë në transfertën ndaj Lecces. Pesë gola në dy ndeshje janë një shifër që, në epokën e tri pikëve për fitore, pra nga sezoni 1994-95 e deri më sot, vetëm një futbollist tjetër kishte arritur ta regjistronte.

Bëhet fjalë për Gabriel Omar Batistutan, legjendën e Fiorentinës. Në sezonin 1997-98, argjentinasi shënoi tri gola ndaj Udineses në javën e parë dhe dy të tjerë kundër Barit në ndeshjen pasardhëse. Edhe ai e mbylli kështu startin e kampionatit me pesë gola.

Që prej asaj kohe, asnjë sulmues nuk kishte mundur të kalonte shifrën e katër golave në dy javët e para të Serie A. Tani Malen ka barazuar rekordin e “Batigol”, duke vendosur menjëherë emrin e tij në historinë e kampionatit italian.

Para Malenit dhe Batistutas, shifra më e lartë në dy ndeshjet e para të kampionatit ishte katër gola. Një prej atyre që iu afrua më shumë rekordit ishte Dario Hubner me Brescia-n, në të njëjtin sezon kur Batistuta vendosi rekordin. Sulmuesi italian shënoi një gol ndaj Interit në San Siro dhe më pas realizoi një tripletë në barazimin 3-3 kundër Sampdorias.

Në kuotën e katër golave në dy javët e para kanë mbërritur ndër vite edhe emra të mëdhenj si Ciro Immobile, Paulo Dybala, Mauro Icardi, Andrea Belotti, David Trezeguet dhe Eder.