50 mijë tifozë shqiptarë në Euro2024, mediat serbe në alarm: Mund të krijojnë kaos…

Rreth 50 mijë është numri i shqiptarëve që mbështesin kombëtaren kuqezi në Euro2024, ndërsa ndeshjen e parë Shqipëria do e luajë kundër Italisë.

Prania e lartë e tifozëve shqiptarë në Gjermani duket se ka shqetësuar mediat serbe, që mesa duket nuk e kanë harruar ende të famshmen “Provokacija”.

Serbia dhe Anglia do të luajnë takimin e parë të Grupit C në Europian, të dielën në orën 21:00.

Dhe pikërisht nga kjo, mediat serbe paralajmërojnë se tifozët shqiptarë të stacionuar në Dortmund mund të zhvendosen në Gelsenkirshen, që nuk është shumë larg, për të shkaktuar kaos me tifozët serbë.

Korrespondentët e “Blic.rs” nga Gjermania shkruajnë: “sipas njohurive tona, ajo ditë do të jetë shumë “e nxehtë”, sepse në Dortmund janë 50 mijë tifozë shqiptarë. Shumë prej tyre do të vijnë në Gelsenkirshen aty pranë, ku po luan Serbia, për të krijuar kaos.

Në ditën e ndeshjes sonë me Anglinë, kjo do të jetë një sfidë e dyfishtë për tifozët tanë për të treguar se askush nuk mund t’i provokojë ata, veçanërisht nëse e dimë që po vijnë edhe huliganët anglezë.

Dhjetëra mijëra shqiptarë do të jenë në Dortmund sepse kombëtarja e tyre po luan atje një ditë më parë me Italinë dhe kur të jenë tashmë atje, një ditë më vonë do të shkojnë në një qytet aty pranë për të provokuar serbët”.

Por, nëse serbët druhen nga prania e madhe e shqiptarëve, mediat kroate e shikojnë me një sy tjetër këtë realitet.

Ja si e vlerëson “index.hr”: “Një numër kaq i madh i shqiptarëve nuk është për t’u habitur.

Ky është vetëm kompeticioni i dytë i madh në histori, në të cilin kombëtarja e tyre është kualifikuar. Ndaj ka eufori në vend dhe të gjithë duan ta shikojnë kombëtaren live në Euro. Përveç kësaj, ka një diasporë të madhe shqiptare në Gjermani dhe në vendet fqinje.