6 gola në 8 goditje, Cristian Shpendi i ka bërë nisje spektakolare në Itali

Cristian Shpendi po përjeton një nisje fantastike të sezonit në Itali. Sulmuesi shqiptar ka tërhequr vëmendjen me paraqitjet dhe statistikat e tij te Cesena, duke u kthyer në një prej protagonistëve kryesorë të këtij fillimi të kampionatit.

Në pesë ndeshjet e para, Shpendi ka realizuar 6 gola, një shifër që e vendos në krye të listës së golashënuesve, jo vetëm në Serie B, por edhe si një prej sulmuesve më efikasë në futbollin italian.

Shqiptari ka luajtur 424 minuta nga 450 të mundshme, duke qenë thuajse gjithmonë në fushë. Ajo që bie veçanërisht në sy është efikasiteti i tij përpara portës.

Shpendi ka regjistruar vetëm 11 tentativa për gol, prej të cilave 8 kanë përfunduar në kuadrat dhe 6 janë shndërruar në gola. Një rendiment që tregon qartë saktësinë e tij të lartë në finalizim.

Paraqitjet e sulmuesit kuqezi kanë bërë që në Cesena të nisin të mendojnë që tani për të ardhmen e tij, sidomos në prag të merkatos së janarit, pasi interesimi për të mund të rritet ndjeshëm.

Për këtë situatë është pyetur edhe drejtori sportiv i Cesenës, Andrea Mancini, i cili ka vlerësuar maksimalisht profilin e Shpendit dhe ka pranuar se mbajtja e tij në skuadër në janar mund të jetë një mision i vështirë.

“Si një sulmues tipik, ai ka një instinkt prej killeri. Sulmues të tillë janë gjithnjë e më të rrallë në qarkullim. Jam shumë i lumtur për të. Ai nuk është vetëm një sulmues i veçantë dhe i fortë, por edhe një djalosh i artë”, është shprehur Mancini.

Drejtori sportiv i Cesenës nuk e ka fshehur shqetësimin për të ardhmen e sulmuesit shqiptar.

“Nuk do të jetë e lehtë ta mbajmë në skuadër në janar. E rëndësishme është që atëherë të arrijmë në kushte sa më të mira, më pas do të shohim se çfarë do të ndodhë”, përfundoi ai.