9 largime drejt Seria A, Marseille arkëton 100 milionw euro nga shitjet

Raporti mes Olympique Marseille dhe Serie A këtë sezon ka marrë përmasa të pazakonta, duke u kthyer në një nga historitë më të bujshme të merkatos në Evropë. Klubi francez ka finalizuar nëntë largime drejt Italisë, duke siguruar një arkëtim total që shkon afër 100 milionë eurove.

Lëvizjet janë ndarë mes merkatos së verës dhe asaj të janarit, ku disa marrëveshje u mbyllën edhe në fazat e fundit të afatit, duke i dhënë Marseille një impuls të fortë financiar. Në ditët e fundit të merkatos, Marseille ka forcuar edhe më shumë këtë lidhje, duke mbyllur dy transferime të tjera te Sassuolo, një klub që po shndërrohet në partnerin më të shpeshtë të francezëve në treg.

Këto operacione jo vetëm që rritën bilancin pozitiv të Marseille, por konfirmuan edhe një prirje të qartë: Serie A është kthyer në destinacionin kryesor për shitjet e OM. Përveç tyre, lista plotësohet edhe me marrëveshje të tjera, mes huazimeve dhe shitjeve përfundimtare, ku janë përfshirë edhe klube si Hellas Verona, Cremonese, por edhe ekipe të tjera të elitës italiane.

Shifra e arkëtuar është e jashtëzakonshme për një klub francez dhe tregon qartë një strategji të mirëkalkuluar: Marseille po shfrytëzon maksimalisht interesin e klubeve italiane, duke monetizuar lojtarët në momentin e duhur.

Në sfond të kësaj politike merkatoje qëndron edhe prania e një emri të njohur për futbollin italian: Roberto De Zerbi, trajneri i Marseille, i cili njihet si një nga teknikët më të vlerësuar të viteve të fundit në Serie A. Pikërisht me Sassuolon, De Zerbi ndërtoi një identitet loje që u vlerësua gjerësisht, dhe sot kjo lidhje duket se po ndikon edhe në marrëdhëniet e Marseille me tregun italian.