Abissnet Superiore/ Statistikat e fazës së tretë, Vllaznia skuadra më e mirë në 9 javët e fundit

Faza e tretë e kampionatit “Abissnet Superiore” është mbyllur pas javës së 27-të, duke sjellë një panoramë të qartë të formës së skuadrave kryesore të kampionatit në 9 ndeshjet e fundit.

Skuadra që ka spikatur më shumë gjatë kësaj faze është Vllaznia. Ekipi shkodran ka regjistruar 7 fitore dhe 2 humbje, duke grumbulluar 21 pikë, më shumë se çdo skuadër tjetër në këtë periudhë. Kjo ecuri e ka ndihmuar Vllazninë të ruajë vendin e parë në renditje dhe të konfirmojë formën e mirë në këtë pjesë të sezonit.

Pas saj renditet Partizani, që ka zhvilluar gjithashtu një fazë shumë pozitive. Të kuqtë kanë arritur 6 fitore, 1 barazim dhe 2 humbje, duke grumbulluar 19 pikë në fazën e tretë dhe duke u afruar ndjeshëm me zonën e kreut të renditjes.

Një paraqitje solide ka bërë edhe AF Elbasani. Verdheblutë kanë regjistruar 4 fitore, 4 barazime dhe vetëm 1 humbje, duke marrë 16 pikë në këtë fazë.

Kampioni në fuqi, Egnatia, ka pasur një ecuri më të balancuar gjatë fazës së tretë, me 3 fitore, 3 barazime dhe 3 humbje, duke grumbulluar 12 pikë në 9 takime.

Ndërkohë, Dinamo City ka hasur më shumë vështirësi në këtë periudhë. Blutë kanë regjistruar 1 fitore, 4 barazime dhe 4 humbje, duke siguruar 7 pikë gjatë fazës së tretë të kampionatit.

Me përfundimin e kësaj faze, gara në Abissnet Superiore pritet të bëhet edhe më e fortë në javët e mbetura të sezonit, ku çdo pikë do të jetë vendimtare si për objektivat në krye të renditjes, ashtu edhe për skuadrat që synojnë të përmirësojnë pozicionin e tyre në tabelë.