Alarm te Brazili/ Neymar pëson dëmtim dhe rrezikon debutimin në Botërorin 2026

Ylli brazilian Neymar ka pësuar një tjetër problem fizik gjatë grumbullimit me kombëtaren e Brazilit për Botërorin 2026, duke u detyruar të ndalet për disa javë pas një dëmtimi muskulor në pulpë.

Konfederata Braziliane e Futbollit bëri të ditur se sulmuesi është diagnostikuar me një dëmtim muskulor të shkallës së dytë në zonën e pulpës, çka pritet ta mbajë jashtë fushave për rreth dy deri në tre javë.

Lajmi u konfirmua nga mjeku i kombëtares braziliane, Rodrigo Lasmar, i cili foli për gjendjen e futbollistit pas ekzaminimeve të kryera në qendrën stërvitore të Brazilit në Teresópolis.

“Sot Neymar iu nënshtrua të gjitha testeve mjekësore, përfshirë rezonancën magnetike, e cila konfirmoi një dëmtim të shkallës së dytë në pulpë dhe jo vetëm një ënjtje. Presim që rikuperimi të zgjasë dy deri në tre javë”, deklaroi Lasmar.

Si pasojë e dëmtimit, Neymar do të mungojë në ndeshjet miqësore përgatitore të Brazilit dhe gjithashtu rrezikon të humbasë debutimin e kombëtares ndaj Marokut në Kupën e Botës.