Allegri e do te Juvja, United fikson çmimin për shitjen e Paul Pogba

Manchester United mund të lejojë largimin e Paul Pogba gjatë kësaj vere, por jo për një shifër të ulët. “Djajtë e Kuq” e kanë kuptuar dëshirën e lojtarit për të provuar një aventurë të re dhe e kanë nxjerrë në merkato.

Klubi anglez kërkon 80 milion euro për të lënë të lirë 28-vjeçarin, për të cilin shpenzoi 35 milion më shumë për ta blerë nga Juventusi në verën e vitit 2016. Pikërisht klubi italian, aty ku Pogba kaloi katër sezone fantastike, pritet të jetë destinacioni i tij i ardhshëm. Max Allegri e do sërish në skuadër.

Shuma e kërkuar nga United është e konsiderueshme, teksa edhe agjenti i kampionit të botës, Mino Raiola, ka kërkesa të larta sa i përket rrogës së lojtarit dhe komisioneve të operacionit. Juventusi është i interesuar prej kohësh për të rikthyer mesfushorin në Torinon bardhezi, por shifra prej 80 milionë eurosh e bën të vështirë këtë lëvizje për në verë.