Brazili ka marrë një lajm shumë pozitiv para sfidës së rëndësishme ndaj Skocisë në Botërorin 2026. Trajneri i “Seleçaos”, Carlo Ancelotti, ka konfirmuar se Neymar është rikuperuar plotësisht dhe është i gatshëm të luajë nga minuta e parë.
Në konferencën për shtyp para ndeshjes, tekniku italian u shpreh i kënaqur me gjendjen e sulmuesit brazilian, duke theksuar se ai mund ta përballojë pa problem të gjithë takimin.
“Ka një qëndrim fantastik, është rikuperuar dhe mund të luajë 90 minuta. Jam vërtet shumë i lumtur për të”, deklaroi Ancelotti.
Trajneri i Brazilit foli edhe për zëvendësuesin e Raphinha, i cili nuk do të jetë në dispozicion. Sipas tij, vendin e tij do ta marrë Rayan.
“Rayan do të luajë sepse është një futbollist që i jep gjerësi lojës sonë dhe kjo është shumë e rëndësishme për ekipin. Gjithsesi, kam në dispozicion shumë lojtarë dhe alternativa të shumta”, shtoi tekniku brazilian.
Rikthimi i Neymarit konsiderohet një përforcim i madh për Brazilin në prag të përballjes me Skocinë, ndërsa Ancelotti shpreson që ylli brazilian të jetë vendimtar në objektivin për të siguruar kualifikimin në fazën me eliminim direkt të Botërorit 2026.