Arsenali fitore dramatike ndaj West Ham, dy ndeshje larg titullit

Arsenali ka bërë një hap të rëndësishëm drejt titullit në Premier League, pasi mposhti 1-0 West Ham United në javën e 36-të të kampionatit, në një ndeshje të zhvilluar në London Stadium.

Me këtë fitore, “Topçinjtë” e Londrës ngjiten në kuotën e 79 pikëve në krye të renditjes, duke krijuar përkohësisht një avantazh prej 5 pikësh ndaj Manchester City, që ka ende një ndeshje të prapambetur ndaj Crystal Palace. Ndërkohë, West Ham mbetet në vendin e 18-të me 36 pikë, duke u përfshirë në zonën e rrezikut.

Ndeshja u dominua në pjesën më të madhe nga Arsenal, veçanërisht në 45 minutat e para, ku skuadra krijoi disa raste të rrezikshme, por u ndal nga mbrojtja e organizuar dhe paraqitja e mirë e portierit vendas.

West Ham rrezikoi në fundin e pjesës së parë me një goditje me kokë, por portieri David Raya bëri një pritje vendimtare për të mbajtur portën e paprekur.

Në pjesën e dytë, vendasit u tërhoqën më shumë në mbrojtje, ndërsa Arsenal mbajti kontrollin e lojës, por pati vështirësi në finalizim. Raya vijoi të jetë vendimtar në minutën e 77-të, duke ndalur një rast të pastër të Matheus Fernandes.

Goli i fitores për Arsenal erdhi në minutën e 82-të, kur Leandro Trossard shënoi nga brenda zonës pas një asistimi të saktë nga Martin Ødegaard.

Në minutat shtesë, West Ham mendoi se kishte gjetur golin e barazimit, por pas ndërhyrjes së VAR-it, goli u anulua për faull ndaj portierit, duke i dhënë Arsenalit një fitore të artë në garën për titull.